Mjeku: Cilësia e njëjtë, kostoja 80 herë më e madhe
"Koncesionari përdor energjinë dhe ujin e shtetit për shërbimin"
Në një prononcim për "News 24", mjeku Artan Koni, i cili ishte i pranishëm në dorëzimin e kallëzimit në Prokurorinë e Posaçme, tha se gjithë dyshimi ka nisur nga kostoja financiare dhe nga një raport i Kontrollit të Lartë të Shtetit. Koni shtoi se kjo nuk është padi ndaj një personi të vetëm, por janë dyshime për një kontratë abuzive dhe është Prokuroria që duhet ta vërtetojë. "Jemi nisur si fillim nga kostot financiare. Të thuash që sterilizimi kushton mesatarisht 190 euro dhe mjekët e kanë rrogën sa sterilizimi i dy mjeteve kirurgjikale, kjo nuk bën sens. Pse lindi nevoja që një shërbim, i cili kryhej shumë mirë në spitalet shtetërore, t'i jepej me koncesion privatit. Pse do jepej me koncesion, kur mund të jepej me tender. Janë disa pika që të bëjnë të lindin dyshime. I mbetet Prokurorisë ta vërtetojë këtë fakt. Nëse këto dyshime përkthehen në fajtorë realë, ata të shkojnë para drejtësisë, ky është thelbi. Nuk është një padi ndaj një personi të caktuar. Është një dyshim që kemi ne si qytetarë. Ky është një dyshim për një kontratë abuzive, për një koncesion abuziv. I mbetet Prokurorisë së Posaçme ta hetojë e vërtetojë", deklaroi Koni. Me tej, mjeku thotë se sa i takon cilësisë, nuk ka pasur ndonjë ndryshim, ndërkohë që kostoja është shume e lartë. "Kjo doli kur lexuam raportin e KLSH- së në vitin 2018. Në faqen 22 thotë se në Spitalin e Traumës janë paguar 32 mijë euro më shumë energji elektrike, sepse këtë energji elektrike e ka shpenzuar vetë koncesionari. Kur e shpenzon vetë koncesionari, pse nuk e paguan vetë energjinë elektrike kur paguhet nga shteti? Shërbimi i koncesionarit sa i përket cilësisë ka qenë pak a shumë siç ishte më përpara. Pra, si cilësi është pak a shumë e njëjta, me disa përmirësime të vogla, ndërsa me kosto gati 80 herë më e madhe", u shpreh ndër të tjera Koni.
PËR MEDIAT Në dalje të Prokurorisë së Posaçme, përfaqësues të Nismës Thurje folën për mediat. Ndërsa shprehën besim në punën e SPAK- ut, ata kërkuan hetim që nga ish ministri Ilir Beqja, deri te të gjithë zyrtarët që kanë pasur të bëjnë me këtë tender. "Ne i kemi kërkuar Prokurorisë së Posaçme, duke respektuar Kodin e Procedurës Penale, që kur jemi përpara një vepre penale që ndiqet kryesisht, të bëjmë një kallëzim në Prokurori për hetimin e kësaj çështjeje edhe kur nuk njihet zyrtari përkatës që ka kryer, konsumuar veprën penale. Megjithatë, ne i kërkojmë Prokurorisë së Posaçme që ta nisë hetimin duke filluar që nga ishministri Beqja, deri te të gjithë zyrtarët e tjerë të përfshirë në këtë kontratë koncensionare, e cila në këndvështrimin tonë ka dyshime të arsyeshme për të parë që ka dëmtuar buxhetin e shtetit. Kjo është një nga dhjetëra rastet, ku ne kuptojmë qartë që nuk jemi një vend i varfër, por jemi një vend i vjedhur. Ne jemi një vend i vjedhur, pasi në 30 vjet këtu nuk është ndëshkuar askush. Në 30 vjet, zyrtarët publikë kanë abuzuar me pushtetin e vet, kanë pasuruar veten dhe familjet e tyre duke varfëruar shqiptarët. Ne besojmë se jemi para një epoke të re, ne besojmë se institucionet e reja të drejtësisë do t'i japin fund pandëshkueshmërisë. Sot kemi ardhur për t'i kërkuar Prokurorisë së Posaçme të justifikojë besimin tonë", tha njëri prej përfaqësuesve të Nismës Thurje.