Krimi kibernetik, SHBA dhuron pajisje për Policinë
Pjesë e programit, 1.3 milionë dollarë të Amerikës për trajnime
Shërbimi i Sigurisë Diplomatike ( DSS) dhe Ndihmës së Antiterrorizmit, ATA, i dhurojnë Policisë së Shtetit pajisje kompjuterike për krimin kibernetik, për Drejtorinë e Antiterrorit dhe Laboratorin Kriminalistik. Gjatë një takimi që u zhvillua dje në ambientet e Drejtorisë së Përgjithshme të Policisë së Shtetit, u organizua ceremonia e dhurimit të pajisjeve kompjuterike të Policisë së Shtetit nga Shërbimi i Sigurisë Diplomatike ( DSS) dhe Ndihmës së Antiterrorizmit, ATA, programe të Departamentit të Shtetit, në bashkëpunim me Zyrën Rajonale të Sigurimit në Ambasadën e Shteteve të Bashkuara të Amerikës. Drejtori i Përgjithshëm i Policisë së Shtetit, Ardi Veliu, dhe shefja e Zyrës Rajonale të Sigurimit të Shërbimit Diplomatik në Ambasadën amerikane në Tiranë, Janet Meyer, kanë nënshkruar aktin e dhurimit të këtyre pajisjeve. Ardi Veliu ka falënderuar Jenet Meyer për ndihmën, mbështetjen dhe suportin në vijimësi që ambasada amerikane dhe Programi i Ndihmës së Antiterrorizmit ka dhënë e po i jep Policisë së Shtetit dhe ka theksuar se Policia e Shtetit është e vendosur për të bashkëpunuar ngushtësisht me partnerët strategjikë për të luftuar krimin e organizuar dhe terrorizmin. Dhurimi i këtyre pajisjeve është në vijimësi të programit 1.3 milionë dollarë nga SHBA, për trajnime dhe suport për Policinë e Shtetit. Gjatë këtij viti, por edhe vitin e kaluar janë kryer 5 kurse trajnimi kundër terrorizmit me fokus hetimet terroriste dhe hetimet kibernetike. Në fillim të vitit u organizua edhe një dyditor, pjesë e programit të trajnimeve nga ambasada amerikane, që do të ndihmojë në sigurimin e kornizës organizative të ligjeve dhe politikave që politikëbërësit t'i marrin në konsideratë kur hetojnë dhe i ndjekin penalisht terroristët. Në seminarin dyditor që u zhvillua në Tiranë gjatë muajit prill, mbi përdorimin terrorist të teknologjisë, Moses- Ones nxiti Policinë që të vazhdojë në të njëjtin drejtim në luftën kundër terrorizmit, duke vlerësuar kontributin e saj. "Policia e Shtetit në Shqipëri vazhdon të ndërtojë një emër si një nga organizatat e Policisë më të mira në Europë. Dua të vlerësoj përpjekjet e policisë gjatë vitit të kaluar. Keni treguar profesionalizëm për të mbrojtur qytetarët. Dëshiroj t'ju nxis që të vazhdoni në atë drejtim. Është një kohë e rëndësishme për sundimin e ligjit dhe sigurinë rajonal", u shpreh e ngarkuara me punë e SHBA- ve, në atë kohë.