Arrestohet Aleksandër Gjoka, po drejtonte makinën nën efektin e alkoolit
Këngëtari po kthehej nga Dajti në mesnatë me automjetin “Chevrolet”, pas testit niveli i alkoolit ishte në masën 0.66 miligram për litër
As këngëtari i njohur Aleksandër Gjoka nuk u ka shpëtuar masave të rrepta të Policisë Rrugore në drejtim të parandalimit të aksidenteve, që kryesisht lidhen me përdorimin e alkoolit gjatë drejtimit të mjetit.
Ai është arrestuar pak pas mesnate kur po kthehej nga Dajti, në rrugën “Sotir Caci” në Tiranë, pasi po drejtonte makinën nën efektin e alkoolit. Burime zyrtare të Policisë së kryeqytetit thanë se pas matjes së nivelit të alkoolit me aparatin “Drager”, rezultoi me masën 0.66 miligram për litër. Pas rezultatit të testit, shërbimet e Komisariatit Nr. 4 kanë kryer arrestimin e tij në flagrancë, për veprën penale “Drejtim i automjetit në mënyrë të parregullt”. Këngëtari 60vjeçar është shoqëruar në Komisariat menjëherë pas ndalimit rreth orës 00: 15. Gjithashtu është bërë edhe bllokimi i mjetit tip “Chevrolet” që ai drejtonte, deri në përfundim të procedurave nga ana e Policisë Rrugore. Brenda dy ditësh, Aleksandër Gjoka pritet të paraqitet në Gjykatën e Tiranës, e cila do të caktojë masën e sigurimit personal.
MASAT Policia Rrugore e kryeqytetit, krahas detyrimeve të tjera si menaxhimi i ngarkesës së trafikut, kryesisht në zonat e tregjeve industriale dhe pranë shesheve e qendrave tregtare, ka vijuar kontrollet parandaluese për evidentimin dhe procedimin e shkeljeve që janë burim për aksidente rrugore. Patrullimet dhe verifikimet janë fokusuar ndaj përdorueseve të mjeteve, që drejtojnë makinat pas përdorimit të alkoolit apo me shpejtësi mbi normat e lejuara, për përdorim të aparatit celular gjatë drejtimit të mjeteve, për parkime të gabuara në rresht të dytë etj. Policia tha dje se pas verifikimeve të kryera, janë arrestuar 18 drejtues mjetesh dhe motomjetesh, nga të cilët 13 në gjendje të dehur dhe 4 të papajisur me leje drejtimi. Janë pezulluar 174 leje drejtimi, nga të cilat 49 për drejtim mjeti nën efektin e alkoolit, 84 për shpejtësi mbi normat e lejuara, si dhe 41 për shkelje të tjera të rregullave të qarkullimit rrugor. Janë proceduar administrativisht 175 drejtues motomjetesh për mospërdorim të kaskës mbrojtëse, si dhe janë vendosur gjoba për 2089 mjete për pushim dhe qëndrim të gabuar.