Zbulohen fletët e votimit, si u penalizua Gjata nga Minga e Petro
Muzikologia dhe poetja i japin Elvanës pikët minimale, përmbysin vullnetin dhe të anëtarëve të huaj të jurisë
Ngjarja më e rëndësishme e këngës uli siparin këtë të diel, për të nisur rrugëtimin në skenën ndërkombëtare të Eurosong- ut.
Arilena Ara me “Shaj”, një këngë e kompozuar nga Darko Dimitrov dhe Lazar Cvetkovski e me tekst të Lindon Berishës, triumfoi ndër 20 finalistët.
Ndryshe nga “gjykimi popullor” i reflektuar nga klikimet në kanalin e “Youtube”, ku më e pëlqyera ishte këngëtarja Elvana Gjata, anëtarët e jurisë, më saktë etnomuzikologia Mikalea Minga dhe poetja Rita Petro vendosën që pikët maksimale t’i ndanin mes Bojken Lakos dhe Arës. Në fletat e votimit bërë publike nga RTSHja, Petro i jep këngës “Shaj” 18 pikë e 13të “Malaseen”, ndërsa Minga, duke qëndruar te po këta dy emra, pikët maksimale ia jep Lakos. Përmbysja e vullnetit të tre anëtarëve të huaj, Christer Björkman ( këngëtar dhe producent suedez), kompozitorit grek Dimitris Kontopoulos e kryetarit të delegacionit të Islandës, Felix Bergsson, për t’ia dhënë çmimin e parë të Festivalit të Këngës në Radio Televizionin Shqiptar, duket qartë se vjen po nga dy anëtaret shqiptare. “Ky është rasti që tregon se mendimi i jurisë profesioniste prevalon mbi gjykimin e përgjithshëm”, thekson gazetari Eni Shehu gjatë postfestivalit, por Minga përgjigjet se ndoshta jo çdo juri do të zgjidhte këtë rrugë. Një zgjedhje e guximshme ajo e muzikantes, që në një kohë kur publiku brohoret për Elvanën dhe në botën virtuale kënga e saj bëhet më e klikuara, ajo vë pikën mbi “i”, duke bërë që në Festivalin e Këngës të vlerësohet vokali, poezia, harmonizimi i komponentëve, duke vlerësuar Gjatën me vetëm 2 pikë. Më e butë tregohet Petro, me 8 pikët për Elvanën, duke e mbajtur në top 5- shen me pikët e saj, por pa e konsideruar si fituese të mundshme. Elvana mbetet kështu në vendin e dytë, duke u lënë vendin diskutimeve nëse në Eurosong duhet një këngë skenike, apo profesionaliteti, vokali, muzika duhet të jenë kryefjala. Në valën e këtyre debateve, Minga pason propozimin e këngëtarit të ri Tiri Gjoci, duke u shprehur se për festivalet e ardhshme duhet menduar një opsion tjetër për Eurovizionin. “Do të ishte mirë që kënga përfaqësuese për në Eurosong të zgjidhej mes 3 këngëve finaliste”, propozon ajo. Po në postfestival, gazetarët e ftuar në panel mundën të diskutojnë edhe për tekstet e këngëve. Siç u vu re edhe në këngët finaliste, jo në pak raste këngëtarët zgjedhin të krijojnë vetë tekstin, pa marrë parasysh poezitë e autorëve të mirëfilltë, siç është edhe vetë rasti i poetes Rita Petro, pjesëmarrëse disa herë në festival me poezitë e saj. Poetja, lidhur me këtë çështje, pohoi se në edicionin e 58- të të Këngës kishte këngë të mira dhe të dobëta, një fenomen që sigurisht nuk i bën nder jurisë që ka vlerësuar këngët. Petro po ashtu u sugjeroi të rinjve që guxojnë të krijojnë për kompeticione të tilla, që të lexojnë më shumë, pasi librat do të hapin shtigje të reja, për të përcjellë në mënyrë dinjitoze ndjesitë përmes vargjeve. Ndër këngët që ka marrë vëmendje për poezinë e muzikën e Adrian Hilës, është edhe “Ajër” e Sara Bajraktarit. Një këngë që gjatë spektaklit duket se mori vëmendjen edhe të këngëtares Ema Qazimi, e cila u shpreh se këngë të tilla e bëjnë të ndihet optimiste për të ardhmen e muzikës shqiptare. Në Festivalin e 58- të, që pas 47 vitesh, qe nën regjinë e Vera Grabockës ( në ’ 72- shin bashkëregjisore me Mihal Luarasin), u vërtetua se pavarësisht frymës së përgjithshme pesimiste, ndryshe nga Festivali i 11- të, fjala e fundit u mbeti profesionistëve.