Nga tuneli në Llogara te Kampusi, Rama shpall 7 prioritetet: Brenda 6 muajsh shtëpitë e para
TAKIMI ME MINISTRAT NE GOLEM: SOT VENDIMI PER BONUSIN E PENSIONISTEVE
Banorët me shtëpi private që u prekën nga tërmeti i 26 nëntorit të këtij viti, do të jenë të parët që do të sistemohen. Ky ishte një nga konkluzionet që nxori kreu i qeverisë pas mbledhjes së fundvitit të qeverisë.
Në një deklaratë për mediat pas 7 orësh mbledhje, shefi i ekzekutivit u shpreh se banorët, të cilët kanë jetuar në apartamente, do të vijojnë të qëndrojnë me qira derisa të ndërtohen godinat që janë parashikuar. “Objektivi ynë është që brenda pranverës gjithçka të jetë e nisur dhe brenda 6- mujorit të parë një pjesë e madhe e atyre që janë sot në banesat individuale të jenë sistemuar në një shtëpi të re. Ndërkohë që, sigurisht, ata që do të hyjnë në apartamente në lagjet e reja që do ndërtohen, do vazhdojnë të qëndrojnë në sistemin e qirasë, deri kur të jenë gati për të ardhur në shtëpitë e reja”, tha Kryeministri. Jashtë vëmendjes së mbledhjes së fundvitit të qeverisë ku bëhet edhe bilanci i punëve për vitin që po lëmë pas nuk kanë qenë edhe pensionistët. Megjithatë, kreu i qeverisë nuk pati një përgjigje përfundimtare nëse do të ketë shpërblim për moshën e tretë. Sipas Ramës, një element shumë i rëndësishëm që do të përcaktojë nëse do të ketë shpërblim për pensionistët dhe masën e shpërblimit është konferenca e donatorëve për rindërtim. “Jemi të kujdesshëm, sepse duam të jemi të sigurt 100% që do ta përballojmë qoftë edhe vetë rindërtimin dhe për këtë na duhet të presim edhe rezultatet e Konferencës së Donatorëve dhe të gjithë këtij procesi angazhimi të miqve e partnerëve për fondet, në mënyrë që të kemi një qartësi mbi sa do jetë barra e përgjithshme dhe sa do jetë barra jonë në barrën e përgjithshme. Kështu që, për këtë gjë do komunikojmë në vijim, por sigurisht që është një pyetje me vend dhe është një shqetësim që unë e kam shumë të qartë dhe shumë të fortë”, tha Kryeministri.
PRIORITETET Në vijim, Kryeministri prezantoi disa nga prioritetet që do ketë qeveria e majtë për vitin e ardhshëm. Sipas tij, pavarësisht nevojës që u krijua për fonde pas tërmetit, po shikohen mundësitë që projektet e prezantuara më parë të mos preken. Muajin janar, qeveria, sipas Ramës, do ta nisë me miratimin e ligjit të KÇK- së dhe më tej me kampusin universitar. “Menjëherë pas Vitit të Ri, ne do kalojmë aktin, i cili u pengua për shkak të gjendjes së emergjencës, kundër krimit të organizuar dhe KÇK- së dhe njëkohësisht do vijojmë punën me Paktin për Universitetin.
Ka nisur procedura dhe në pranverë do jemi në kantier për kampusin e madh universitar të Tiranës, që do përfshijë ish- Qytetin Studenti, Akademinë e re të Sigurisë dhe Akademinë e Arteve”, tha Rama. Një tjetër investim për vitin e ardhshëm është planifikuar për laboratorin shkencor të Akademisë së Sigurisë. Ndërsa sa i përket sektorit të infrastrukturës dhe energjetikës, shefi i qeverisë përmendi disa nga prioritetet. “Kemi nisur procedurën për Aeroportin e Vlorës. Shumë shpejt do shpallet procedura për Parkun e madh Fotovoltaik në zonën e Divjakës. Shumë shpejt do shpallet procedura për rrugën e re që do ndërtohet tërësisht nga e para, Thumanë- Kashar
Rrogozhinë, pra, një segment Thumanë- Rrogozhinë. Po ashtu, po punohet dhe shpejt do shpallet procedura për tunelin e Llogarasë, që është një tjetër vepër e rëndësishme publike, pastaj një sërë veprash të tjera, Shëngjin- Velipojë e të tjera vepra goxha të rëndësishme”, Vijoi Rama. Ndërkohë, shumë shpejt Rama tha se do kalojë në Parlament ligjin e ri për tokën, që sipas tij zgjidh problemet ku nuk ka funksionuar 7501- shi.