NE GJITHE VENDIN
Legalizimet, lista me 4200 familjet që marrin tapinë
Kadastra miraton lejet e legalizimit për 4200 familje. Gazeta boton emrat e përfituesve në Tiranë e 12 bashki. Procedurat që duhet të ndjekin familjet
Janë 4200 familje që kanë gati lejen e legalizimit dhe mund të paraqiten duke filluar nga sot për ta tërhequr atë në sportelet e agjencisë.
"Janë të lutur, të gjithë qytetarët e qyteteve të Durrësit, Elbasanit, Shkodrës, Kamzës, Vorës, Fierit, Kavajës, Kukësit, Lezhës, Mirëditës, Pogradecit, Tirana Jug, Tirana Rurale 1, që gjejnë emrin në listat e mëposhtme, të paraqiten pranë zyrave rajonale të Kadastrës për të tërhequr lejen e legalizimit", thuhet në njoftimin e Kadastrës. Gazeta publikon sot një pjesë të listës për të vijuar edhe nesër me pjesën e mbetur.
MARRJA E TAPISË
Menjëherë pas kësaj faze nis edhe regjistrimi dhe dhënia e certifikatës së pronësisë. Ligji i ri parashikon një afat 60- ditor për përmbylljen e kësaj praktike. Ndërsa ata, të cilët duan të përshpejtojnë procedurat, mund ta bëjnë këtë, por duke paguar një faturë shtesë. "ASHK, brenda 60 ditëve nga përfundimi i procedurave të kualifikimit, legalizon ndërtimin, duke respektuar dispozitat e legjislacionit në fuqi për regjimet pasurore martesore. Poseduesi i ndërtimit pa leje ka të drejtë të kërkojë kryerjen e procedurave të legalizimit brenda 30 ditëve, kundrejt pagesës së një tarife shërbimi shtesë", përcaktohet në ligj. Janë me dhjetëra familje që kanë përmbyllur procedurat e legalizimit, por që nuk janë paraqitur për të tërhequr lejen. Nga ana tjetër, i lartë është numri i atyre që nuk kanë ende në duar dokumentin e pronësisë, pra prona nuk është regjistruar në emrin e tyre, për shkak të ngërçit të krijuar më herët nga institucioni i Hipotekës.
DEKLARIMET
Përgjatë këtij viti, Agjencia e Kadastrës i ka dhënë përparësi vetëdeklarimeve të kryera përgjatë vitit 2005 dhe 2006. Me anë të një urdhri të firmosur në prill të këtij viti, kreu i ASHK- së, Artan Lame, ka kërkuar nga të gjitha drejtoritë në rrethe që të përmbyllin praktikat për aplikimet e bëra më herët. Ndaj edhe të gjitha ato familje që kanë kryer procedurat e deklarimit në vitin 2005 dhe 2006 mund të paraqiten pranë zyrave të agjencisë dhe pajisja e tyre me certifikatën e pronësisë do të bëhet pa vonesa.