Ademi: Bashkia e Shkodrës, ndër të vetmet pa borxhe

“Rama bën show edhe me tërmetin e 26 nëntorit me 51 jetë të humbura”

Kryebashkiakja në detyrë e Shkodrës, Voltana Ademi, iu kundërpërgjigj dje kreut të qeverisë, Edi Rama, duke i përmendur disa tregues pozitivë të Bashkisë së Shkodrës. Teksa kreu i qeverisë tha se Bashkia e Shkodrës është në situatën më kritike pasi ka një kryetare, që në fakt s’është kryetare, Ademi i kujtoi Kryeministrit se institucioni që ajo drejton është ndër të vetmit pa borxhe dhe që ka dyfishuar të ardhurat. “Bashkia Shkodër është bashkia pa borxhe, që ka dyfishuar të ardhurat e veta, që ka performancën më të mirë në menaxhim dhe administrim, është bashkia transparente dhe që lufton korrupsionin, që u del për zot halleve të bashkëqytetarëve te vet, që shërben e që përpiqet të ndërtojë përditë e me shumë mund”, tha Ademi në një prononcim për “Balkanweb”. Ndërkohë, ashtu si edhe lideri i partisë së saj, edhe Ademi akuzoi Kryeministrin Edi Rama se po e përdor për propagandë fatkeqësinë natyrore të 26 nëntorit dhe shton se situata ekonomiko- sociale po rëndohet çdo ditë e më shumë në vendin tonë. “Në tokën tonë nuk di të kemi pasur ndonjë krizë më të madhe ekonomike, sociale, nuk di të kemi pasur kaq shumë rrjedhë e pa pushim emigracioni të ‘ trurit’, nuk di të kemi pasur një shkatërrim kaq të madh të sistemit institucional. Nuk di të kemi pasur një shkatërrim të burokracisë dhe të administrimit institucional e shtetëror, nuk di të kemi pasur ndonjëherë kaq shumë pasiguri, nuk di të kemi pasur kaq shumë korrupsion. Nuk di të kemi pasur kaq shumë grabitje të pronës e parave publike, nuk di të kemi pasur nivel kaq të ulët të investimeve publike, nivel kaq të ulët e pasiguri të investitorëve dhe investimeve private të huaja”, vijoi Ademi.