Festat e fundvitit, RENEA, FNSH E FAST në gatishmëri
Operacione për kapjen e personave të rrezikshëm e në kërkim
Nga dje, Policia e Shtetit ka kaluar në gatishmëri me shërbime të përforcuara, për garantimin e rendit dhe për të siguruar mbarëvajtjen e festave të fundvitit.
Masat shtesë të Policisë së Shtetit u publikuan dje në një dalje publike nga drejtori i Rendit Publik, Albert Dervishaj. Sipas tij, me qëllim krijimin e një mjedisi të sigurt për qytetarët, Policia ka marrë një sërë masash shtesë për të siguruar mbarëvajtjen e festës së Krishtlindjes, të natës së ndërrimit të viteve dhe gjatë ditëve të para të Vitit të Ri 2020. “Nisur edhe nga përvoja e viteve të kaluara apo e ngjarjeve të ndodhura, Policia e Shtetit ka vlerësuar si të domosdoshme marrjen e disa masave shtesë, si dhe kalimin e të gjithë strukturave të Policisë në gatishmëri ( shërbim të përforcuar). Për këtë qëllim, janë hartuar planet e masave në nivel qendror dhe atë vendor, në të cilat janë përcaktuar objektivat dhe detyrimet për strukturat e saj”, tha dje Dervishaj. Policia e Shtetit e vlerëson si mjaft të çmuar bashkëpunimin me komunitetin dhe në këtë kontekst do të analizojë dhe rivlerësojë informacionet për identifikimin e autorëve të ngjarjeve kriminale kundër jetës dhe pronës, konfliktet për motive të ndryshme dhe për personat në kërkim. Gjithashtu do të organizojnë operacione për kapjen e këtyre personave, duke angazhuar edhe Forcat e Ndërhyrjes së Shpejtë, Repartin Special RENEA dhe Njësinë Speciale FAST. Policia e Shtetit ka planifikuar masa për mbajtjen në kontroll të situatës së sigurisë, në veçanti në sheshe publike, qendra tregtare që frekuentohen nga një numër i madh qytetarësh, lokale dhe restorante apo sheshe ku do të organizohen aktivitete festive etj., duke bashkëpunuar me bashkitë respektive, me qëllim bashkërendimin dhe koordinimin e masave për këtë qëllim.
PLANI I MASAVE Strukturat e Policisë së Shtetit, në bashkëpunim me institucionet e tjera të TaskForcës së krijuar në vitin 2018, po intensifikojnë kontrollet për verifikimin e kushteve të prodhimit, magazinimit, tregtimit dhe përdorimit nga subjektet e licencuara të lëndëve piroteknike dhe fishekzjarrët. Janë evidentuar dhe organizuar shërbime në vende e objekte private, banka, zyra të këmbimit valutor, tregje, lokale dhe objekte ku administrohen vlera monetare e materiale, për të parandaluar ngjarje kriminale. Gjithashtu, strukturat e Policisë do të organizojnë takime me subjektet e shërbimit privat të sigurisë fizike ( SHPSF), për përforcimin e shërbimeve të sigurisë së objekteve, si dhe gjatë shoqërimit dhe transportimit të vlerave monetare. Drejtoritë Vendore të Policisë Durrës, Tiranë e Lezhë kanë marrë masa ekstra në drejtim të ruajtjes së pronës, sidomos në ato zona që u goditën nga tërmeti, me qëllim parandalimin e vjedhjes së pronës. Policia e Shtetit, nëpërmjet këtyre masave synon që festa e Krishtlindjes dhe e Vitit të Ri të kalojnë në mënyrë sa më festive dhe të mos veniten nga episode të mundshme paligjshmërie.