Francë, hekurudhat humbasin 400 milionë euro nga greva për pensionet
Në Francë nuk kanë të reshtur grevat kundër reformimit dhe unifikimit të sistemit të pensioneve, sipas një plani të Presidentit Emmanuel Macron. Të ardhurat e kompanisë shtetërore hekurudhore të Francës ( SCNF) kanë rënë me rreth 400 milionë euro gjatë periudhës së grevës, sipas drejtuesit të kompanisë. “Kjo është një shumë e konsiderueshme”, tha kryetari i SCNF- së, JeanPierre Farandou. Një zëdhënës i kompanisë SNCF deklaroi se udhëtimi hekurudhor vazhdon të ketë ndërprerje edhe në prag të Krishtlindjes, ku në funksion janë vetëm dy e pesta e trenave me shpejtësi të lartë, “TVG”. Gjatë muajit dhjetor, sindikata të shumta kanë zhvilluar greva të vazhdueshme, në protestë kundër planeve të Presidentit Macron për reformimin dhe unifikimin e sistemit të pensioneve në vend. Dhjetëra mijëra njerëz, të cilët kanë shpresuar t’i kalojnë Krishtlindjet së bashku me familjet e tyre në Francë, po përballen me shumë vështirësi për shkak të grevës së punëtorëve të hekurudhave. Presidenti francez bëri thirrje disa ditë më parë që grevistët ta anulojnë grevën gjatë Krishtlindjeve, në mënyrë që të shmangen kaosin në trafik. Por përfaqësuesit e punëtorëve e refuzuan këtë thirrje dhe u zotuan se do ta vazhdojnë grevën edhe gjatë festave të fundvitit. Rreth 40 për qind e shërbimeve të trenave të shpejtë do të anulohen gjatë periudhës së grevës. Protestuesit u përleshën me Policinë të hënën në Paris pasi e filluan një tubim të paparalajmëruar. Sondazhet tregojnë se rreth 62 për qind e popullsisë i përkrahin grevat kundër reformës së pensioneve, të cilat aktualisht shpërndahen sipas 41 skemave të ndryshme, por Macron kërkon t’i përmbledhë në një sistem të vetëm me mbledhje pikësh dhe veç kësaj, kërkohet edhe rritja e moshës së pensionit.