Rusia teston me sukses shkëputjen nga rrjeti botëror i internetit
Rusia ka testuar me sukses një alternativë të vendit për internetin global. Qeveria ruse ka dhënë detaje të paqarta mbi testin, por sipas Ministrisë së Komunikimeve, përdoruesit e zakonshëm nuk vunë re ndonjë ndryshim. Rezultatet tani do t’i prezantohen Presidentit Vladimir Putin. Vendi po teston shkëputjen nga rrjeti botëror i internetit. Rishikimi i të ashtuquajturit “RuNet” u krye gjatë disa ditëve në rrjete të përcaktuara, posaçërisht brenda federatës. Kjo vijon nga projektligji “internet sovran” që hyri në fuqi në nëntor, në përgjigje të asaj që Rusia e quan “strategji agresive të SHBA për sigurinë kibernetike”. Në legjislacionin e ri mandatohen të marrin pjesë të gjitha institucionet shtetërore dhe shërbimet e sigurisë, si dhe operatorët e komunikimit, lajmëtarët dhe ofruesit e postës elektronike. Rusia synon të drejtojë trafikun dhe të dhënat e saj në internet përmes pikave të hyrjes të kontrolluara nga shteti dhe të ndërtojë një sistem kombëtar për t’i dhënë fund varësisë nga sistemet e huaja. “Qëllimi ynë ishte të siguronim një shërbim të pandërprerë të internetit në territorin rus në çfarëdo rrethane”, tha zëvendësministri i Komunikimeve, Aleksei Sokolov. Sipas tij, “Rezultatet e rishikimit treguan se agjencitë qeveritare dhe operatorët e komunikimit janë të gatshëm të përgjigjen në mënyrë efektive ndaj kërcënimeve dhe të sigurojnë që interneti dhe komunikimet të funksionojnë në mënyrë efektive”. Teste të ngjashme do të përsëriten në bazë vjetore. Kritikët e konsiderojnë këtë si pjesë të një përpjekjeje për të izoluar qytetarët e saj nga bota përreth dhe ndikimet e saj.