Miratohet shpërblimi, pensionistët që përfitojnë
Qeveria miratoi dje shpërblimin me 3 mijë lekë për pensionistët. Kategoritë që e përfitojnë e grafiku me datat e shpërndarjes. ISSH: Nis sot ndarja e parave
Çdo pensionist do të marrë këtë fundvit 3 mijë lekë shpërblim. Kriza në buxhet, e pasuar edhe nga nevoja për fonde prej tërmetit të 26 nëntorit, vuri jo pak në pikëpyetje nëse do të kishte apo jo bonus me rastin e festës së ndërrimit të viteve.
Por, vetëm dje qeveria u ka dhënë fund këtyre dyzimeve, duke akorduar një fond në vlerën e 2 miliardë lekëve për pensionistët. Në një dalje të posaçme për mediat, ministrja e Financave dhe Ekonomisë, Anila Denaj, tha se në total janë mbi 663 mijë persona që përfitojnë, prej të cilëve 530 mijë janë pensionistë. "Ndonëse ky ishte një vit jo i lehtë, duke i shtuar kësaj pasojat dhe tragjedinë e tërmetit të 26 nëntorit, e cila merr energji buxhetore, ne mbajtëm zotimin tonë për solidaritet me pensionistët duke akorduar edhe këtë vit, siç është bërë traditë, shpërblimet e fundvitit për këtë kategori. Ky bonus do të jepet në masën 3000 lekë për çdo pensionist dhe kategori tjetër qytetarësh që trajtohen me pensione të veçanta. Nga ky shpërblimi i parashikuar do të përfitojnë 663 227 qytetarë të tjerë me pensione të posaçme, nga të cilët: mbi 530 364 janë pensionistë në pension pleqërie, 67 754 janë në pension invaliditeti, 49 849 janë në pension familjar dhe mbi 13 260 persona të tjerë janë në trajtim financiar me pension social, pension apo trajtim të veçantë financiar si minatorë të nëntokës, punonjës të ish- ndërmarrjeve ushtarake dhe ushtarakë në pension të parakohshëm". Janë 6 kategori, të cilat do të përfitojnë shpërblim. Kështu do të përfitojnë të gjithë ata që marrin pension pleqërie, pension invaliditeti, pension familjar dhe pension social. Po ashtu, pensionistët në fshat, punonjësit e nëntokës, ish- ushtarakët si edhe veteranët. Në skemën e përfitimit janë përfshirë edhe ata, të cilët dalin në pension këtë muaj. Vitin e kaluar pensionistët morën 5 mijë lekë shpërblim dhe fondi i akorduar nga qeveria kapte vlerën e 3.2 milionë dollarëve.
PAGESAT
Prej kësaj së mërkure, pensionistët mund të paraqiten në qendrat paguese të postës për të tërhequr çekun e fundvitit. Instituti i Sigurimeve Shoqërore ka nisur duke filluar nga sot kryerjen e pagesave, duke përcaktuar edhe grafikun e shpërndarjes për të shmangur krijimin e radhëve. "Fillon shpërndarja e shpërblimit të pensionistëve për festat e fundvitit 2019, i cili do të jetë në masën 3, 000 lekë për çdo pensionist, mbështetur kjo në Aktin Normativ datë 24.12.2019 ' Për disa ndryshime në ligjin', ' Për buxhetin e shtetit të vitit 2019". Zyrat Postare të shpërndarjes së pensioneve, duke filluar nga dita e mërkurë, datë 25.12.2019, pavarësisht se kjo datë është festë zyrtare, deri më 31.12.2019 do të kryejnë pagesat e pensioneve dhe shpërndarjen e shpërblimit të fundvitit 2019", thuhet në postimin e bërë dje në rrjetet sociale nga kreu i ISSH- së, Astrit Hado. Bonusi i fundvitit do të tërhiqet bashkë me pensionin. Kjo vlen për ata të cilët nuk e kanë tërhequr atë. Për ata të cilët e kanë marrë, janë caktuar ditët sipas edhe grafikut në tabelë. Vlen të theksohet se pensionistët që nuk do të kenë mundësi ta tërheqin shpërblimin në datat e përcaktuara në grafik, nuk duhet të shqetësohen. Ata kanë mundësi ta përfitojnë në muajin janar. "Në datën 31 dhjetor do të tërheqin shpërblimin pensionistët që tërheqin pensionin në këtë datë dhe ata që e kanë tërhequr pensionin në datën 21- 24 dhjetor, si dhe raste që nuk janë paguar sipas grafikut në ditët më përpara. Ky shpërblim nuk humbet dhe nëse nuk tërhiqet brenda vitit 2019", sqarohet më tej nga ISSH.
TREGUESIT EKONOMIKË
Gjatë konferencës për shtyp, ministrja u ndal edhe te treguesit ekonomikë për 3mujorin e fundit. Sipas INSTAT, rritja ekonomike rezulton të jetë 3.81% më e lartë krahasuar me të njëjtën periudhë të një viti më parë. Ministrja Denaj vlerësoi faktin se performanca e ekonomisë gjatë tremujorit të tretë shkon në linjë me performancën e tregut të punës gjatë këtij tremujori, ku norma e papunësisë njohu sërish një reduktim të konsiderueshëm. "Performanca e mirë e sektorëve të shërbimeve që kanë lidhjen me të drejtpërdrejtë me aktivitetet turistike, piku i të cilave ndodh pikërisht në tremujorin e tretë, ishte gjithashtu një faktor kryesor në këtë përshpejtim të rritjes ekonomike gjatë këtij tremujori. Kjo performancë e ekonomisë gjatë tremujorit të tretë sa i takon rritjes së saj, shkon gjithashtu në linjë me performancën e tregut të punës gjatë këtij tremujori, ku norma e papunësisë njohu sërish një reduktim të konsiderueshëm". Ndërkohë, investimet e huaja direkte janë rritur me 7.3% për 9- mujorin e vitit 2019, duke arritur nivelin e 810 milionë eurove.