SPAK e nis me të përkohshëm, transferohen prokurorët Vladimir Mara e Dritan Prençi
Prokurorët u emëruan në Prokurorinë e Tiranës. Për 1 vit, ata do jenë pjesë e SPAK dhe do hetojnë dhe përfaqësojnë në Gjykatë dosjet
Drejtuesi i Strukturës së Posaçme Antikorrupsion, Arben Kraja, ka vendosur të plotësojë trupën e prokurorëve me transferimin e përkohshëm të Vladimir Marës dhe Dritan Prençit.
Kraja me anë të një shkrese kërkonte edhe mendimin e Këshillit të Lartë të Prokurorisë, që në mbledhjen e djeshme, me 9 vota pro dhe një kundër, vendosi për transferimin e përkohshëm të Vladimir Marës dhe Dritan Prençit në Prokurorinë e Posaçme. Prej 19 dhjetorit, SPAK- u nisi punën me 8 prokurorë, ndonëse në Kushtetutë parashikohej me minimumi 10 prokurorë. Në kërkesën e Krajës, motivacion për transferimin e dy prokurorëve është ngarkesa e madhe dhe dosjet në numër të lartë që këta dy prokurorë kanë nën hetim dhe gjykim. “Këshilli i Lartë i Prokurorisë i ka emëruar prokurorët Vladimir Mara dhe Dritan Prençi për të ushtruar funksionet e tyre në Prokurorinë pranë Gjykatës së Tiranës. Në kushtet e një ngarkese të tillë, e cila është e pamundur të menaxhohet nga prokurorët e emëruar në SPAK, kam vendosur të filloj procedurën e transferimit të përkohshëm të këtyre dy prokurorëve, sipas parashikimeve të nenit 46 të ligjit nr 96/ 2016 ‘ Për statusin e gjyqtarëve dhe prokurorëve në Republikën e Shqipërisë’. Prokurorët Dritan Prençi dhe Vladimir Mara i plotësojnë të gjitha kushtet ligjore që kërkohen për të emëruar një prokuror pranë Prokurorisë së Posaçme Antikorrupsion dhe Krimit të Organizuar, kanë dhënë pëlqimin e tyre për transferimin dhe respektimin e kushteve të sigurisë për besimin dhe konfidencialitetin në Prokurorinë e Posaçme. Për sa më sipër, në datë 23 dhjetor i kam kërkuar drejtuesit të Prokurorisë pranë Gjykatës së Shkallës së Parë Tiranë dhënien e pëlqimit për transferimin e përkohshëm të prokurorëve Vladimir Mara dhe Dritan Prençi në Prokurorinë e Posaçme kundër Korrupsionit dhe Krimit të Organizuar”, shkruhej ndër të tjera në shkresën e kreut të SPAK- ut. PROKURORIA E
POSAÇME Për më shumë se një javë, Prokuroria e Posaçme ka nisur punën dhe është duke përfaqësuar dosjet në gjykim, ndërsa është duke u bërë shpërndarja e punës për dosjet e mbetura në hetim dhe ato që do të vijnë. Gjatë këtyre ditëve, pranë SPAK- ut janë bërë disa kallëzime, një prej tyre ishte ai Nismës Thurje për tenderin e sterilizimit dhënë nga Ministria e Shëndetësisë në vitin 2015. Por nuk kanë munguar edhe padi për anëtarë të Strukturës së Posaçme. Për dy prokurorë të SPAK- ut janë bërë kallëzime, Edvin Kondili dhe Klodian Brahon.
KOMPETENCAT SPAK do të hetojë çdo vepër penale të kryer nga grupi i strukturuar kriminal, organizata kriminale, organizata terroriste dhe banda e armatosur, si dhe korrupsionin. Do të hetojë akuzat penale kundër Presidentit të Republikës, Kryetarit të Kuvendit, Kryeministrit, anëtarit të Këshillit të Ministrave, gjyqtarit të Gjykatës Kushtetuese dhe të Gjykatës së Lartë, Prokurorit të Përgjithshëm, Inspektorit të Lartë të Drejtësisë, kryetarit të bashkisë, deputetit, zëvendësministrit, anëtarit të Këshillit të Lartë Gjyqësor dhe të Këshillit të Lartë të Prokurorisë, si dhe drejtuesve të institucioneve qendrore ose të pavarura të përcaktuara në Kushtetutë ose në ligj. 24 dosje të SPAK- ut që janë në gjykim, nga Moisi Habilaj tek ish- policët Sokol Bode e Gjergji Kohila, apo edhe dosja e 618 kilogramëve kokainë me të pandehur Arbër Çekajn, do të gjykohen nga Gjykata e Posaçme.