Surpriza e Kurtit, VV merr edhe kreun e Parlamentit, LDK e voton
Mustafa: Nuk e prisnim lëvizjen e Vetëvendosjes për kreun e Parlamentit, tani të gjitha marrëveshjet bien në ujë
Kuvendi i Kosovës, i dalë nga zgjedhjet e 6 tetorit, u konstituua në seancën e së enjtes, duke kryer procesin e verifikimit të legjislaturës së shtatë, zgjedhjen e kryetarit dhe nënkryetarëve.
Si fillim u krye verifikimi i mandateve të deputetëve, me 111 deputetët e pranishëm në seancë, të cilët kryen betimin. Gjatë këtij procesi ka pasur edhe një “incident” të vogël ku deputetja e AAK- së, Time Kadrijaj, dhe ajo e PDK- së, Ganimete Musliu ( të dyja parti që kanë deklaruar se do të mbeten në opozitë), i kanë dërguar nga një flamur shqiptar kryetarit të VV- së, Albin Kurti, i cili raportohet se ende mban flamurin kombëtar në zyrën e tij dhe jo atë të Kosovës, me gjithë gjasat për t’u zgjedhur Kryeministër. Pas kalimit të kësaj situate, deputeti më i moshuar, Jahja Koka i Lëvizjes V e t ë v e n d o s j e , kërkoi nga grupi më i madh parlamentar, propozimin për kryetar të Kuvendit. Këtu ndodhi edhe surpriza e madhe e kësaj seance. Deri tani, Vetëvendosje dhe LDK kanë negociuar me formulën që VV merr Kryeministrin dhe LDK Kryeparlamentarin. Edhe pse Kurti ka deklaruar të mërkurën në mbrëmje se negociatat kanë dështuar për të shkuar si koalicion në seancën konstituive të Kuvendit, të dyja palët kanë shprehur vullnetin për të vazhduar të diskutojnë mbi formulën e ardhshme qeverisëse. Por Albin Kurti i VV propozoi bashkëpartiakun e tij, numrin 2 të Vetëvendosjes, Glauk Konjufca si Kryeparlamentar, i cili mori edhe besimin e shumicës së deputeteve. Kurti është shprehur se votimi i Kunjofcës nuk ishte befasi, por më vonë Isa Mustafa i LDK- së ka thënë se kryeparlamentari pritej të ishte nga LDK dhe emri i Kunjofcës ishte befasi. “Askush nga LDK nuk e ka ditur e as nuk ka pritur që Vetëvendosje do të propozojë Kryeparlamentarin... të gjitha marrëveshjet që janë bërë deri tani me VV- në do të bien në ujë”, u shpreh ai në KTV. Me gjithë surprizën, LDK- ja e votoi Kunjofcën, si për të “mbajtur fjalën” e thënë me ironi gjatë ditës së enjte para seancës së Kuvendit, se Vetëvendosje, po deshi, mund të qeverisë edhe vetëm, “ne do t’ia japim votat”. Kurti e cilësoi mbështetjen për Kunjofcën si akt përgjegjshmërie, që nuk bllokoi punën e Kuvendit. Pas votimit të Konjufcës u votuan edhe nënkryetarët Arbërie Nagavci nga Vetëvendosje, Kujtim Shala i LDK- së dhe Memli Krasniqi i PDK- së. Nga pakicat u propozuan dhe u votuan nënkryetarët Fikrim Damka dhe Slavko Simiç. Kunjofca ka falënderuar qytetarët për besimin dhe është zotuar se do t’i kryejnë detyrat sipas ligjit dhe Kushtetutës. Më pas mbylli seancën, duke shtuar se deputetët do të njoftohen në kohë për hapat e ardhshëm. Në seancën konstituive mungoi Pal Lekaj i AAK- së, kryetari i Nismës Socialdemokrate, Fatmir Limaj dhe kryetari i AKRsë, Behgjet Pacolli. Ata do ta bëjnë betimin në seancën e ardhshme, e cila nuk pritet të thirret pa arritjen e një marrëveshjeje ndërmjet Vetëvendosjes e LDK- së.