LDK e VV: “Negociatat për bashkëqeverisje vazhdojnë”
Mustafa: “Gjithçka nis nga fillimi, mund të kalojmë edhe në opozitë”
Procesi drejt formimit të qeverisë së re të Kosovës ka hedhur hapin e parë me zgjedhjen e Kryetarit të Kuvendit dhe nënkryetarëve, duke ia lënë radhën tashmë Presidentit Hashim Thaçi, i cili duhet të thërrasë fituesin e zgjedhjeve, Albin Kurtin, për mandatin e formimit të qeverisë. Kushtetuta saktëson se Presidenti i propozon Kuvendit kandidatin për Kryeministër, në këtë rast, Albin Kurti, i cili jo më vonë se 15 ditë pas emërimit paraqet përbërjen e Qeverisë së re para Kuvendit të Kosovës, dhe kërkon miratim nga Kuvendi. Sipas Kushtetutës së Kosovës, nëse përbërja e propozuar e Qeverisë nuk merr shumicën e votave të nevojshme, Presidenti emëron kandidatin tjetër brenda dhjetë ditësh. Nëse as herën e dytë nuk zgjidhet Qeveria, Presidenti shpall zgjedhjet, të cilat duhet të mbahen jo më vonë se dyzet ditë nga dita e shpalljes së tyre. Pas seancës së Kuvendit, ambasada amerikane në Kosovë uroi Glauk Kunjofcën dhe kërkoi sa më shpejt formimin e Qeverisë. Kreu i LDK- së, Isa Mustafa, pas “surprizës” që mori për Kryeparlamentarin, nuk i ka mbyllur rrugët për vazhdimin e negociatave me VV- në. “Jo se ne kemi ndonjë nevojë të veçantë apo të domosdoshme që të bashkëqeverisim, por sepse qytetarëve të Kosovës iu duhet një qeveri. Por, në asnjë rast, nuk do të lejojmë që LDK- ja të nënçmohet”, ka thënë ai. Mustafa shtoi se “Ne kemi thënë që do të pranojmë se do të heqim dorë nga secila ministri e jona, por vota jonë pastaj lidhet me një program qeverisës, me sigurinë qeverisëse, që ajo qeveri të udhëhiqet mirë dhe mbi të gjitha duhet të komunikojmë”. Në KTV, Mustafa tha se sa për kreun e Kuvendit, situata ka qenë ndryshe, meqë si parti e parë VV- ja e ka pasur të drejtën kushtetuese ta propozojë kryetarin. Për shkak të kësaj situate,
Mustafa tha se gjithçka do të nisë nga fillimi me Vetëvendosjen, pasi marrëveshjet e kryera deri tani për ndarjen e kompetencave nuk u respektuan. “Duhet të bëhet marrëveshje e re lidhur me përgjegjësitë, por ka nevojë edhe te programi qeverisës... Çdo gjë është e hapur, edhe mundësia që të dalim në opozitë, ta bëjmë një opozitë shumë të mirë, të suksesshme”, tha kreu i LDK- së. Por si fillim do të vazhdojnë negociatat. Edhe kreu i Lëvizjes Vetëvendosje, Albin Kurti, tha se do të ketë takime të tjera me Mustafën. “Do t’i kalojmë pengesat dhe do të kemi qeveri të re, ashtu siç patëm Kuvend të ri. Jemi në kontakt të rregullt. Sigurisht që do të kemi takime, bashkëpunim e takime”, tha Kurti.