Thumanë, akuza nga banorët: Të gjenden fajtorët
Kreu i FRPD, Këlliçi: Tragjedia e 26 nëntorit mund të ishte shmangur
Një muaj pas tragjedisë që shkaktoi tërmeti i fuqishëm me magnitudë 6.4 i shkallës rihter, banorët e Thumanës u bëjnë thirrje autoriteteve shtetërore që të gjejnë përgjegjësit, të cilët lejuan banorët e Thumanës të riktheheshin në shtëpitë e tyre, të cilat u shpallën të pabanueshme pas tërmetit të dy muajve më parë.
“U bëj thirrje autoriteteve përkatëse të drejtësisë që të zbardhin ngjarjen. Ne si popull i Thumanës do të jemi këtu çdo muaj, për hir të atyre që humbën jetën për shkak se u lejuan të futen në banesat, të cilat u shpallën të pabanueshme nga tërmeti i 21 shtatorit”, tha Fatmira, një e re nga Thumana. Ndërkohë, dhjetëra të rinj të Partisë Demokratike u rikthyen në Thumanë në një nga vendet më të prekura nga lëkundjet e forta. Ata vendosën 24 karafila, po aq sa viktima shkaktoi tërmeti në vendin ku u shembën 2 pallatet. Kreu i FRPD- së, Belind Këlliçi, në një prononcim për mediat pas ceremonisë përkujtimore tha se tragjedia e 26 nëntorit mund të ishte shmangur nëse autoritetet shtetërore do të kishin bërë punën e tyre pas lëkundjeve që shkaktoi tërmeti i 21 shtatorit. “Kemi vendosur 24 karafila aty ku ishte tragjedia më e fortë. Një tragjedi, e cila mund të ishte shmangur, pasi në tërmetin e 21 shtatorit kjo zonë u godit po aq rëndë dhe pjesa dërrmuese e këtyre banesave u shpallën të pabanueshme dhe fatkeqësisht, në tërmetin e 26 nëntorit humbën jetë 24 persona. Ne i bëjmë thirrje shtetit që të bëhet rivlerësim rigoroz dhe për banesat, të cilat shpallen të pabanueshme dhe të merren masa që banorët të mos kthehen më në të njëjtin vend, në mënyrë që të mos përsëritet e njëjta histori”, tha kreu i FRPDsë. Ndonëse ka kaluar një muaj nga tragjedia, mijëra familje ende nuk e dinë se çfarë do të bëhet me to dhe shtëpitë e tyre, të cilat u shemben.