Lleshaj: Policia do të garantojë qetësinë e festave
"Në fokus, kufiri, rendi dhe personat me precedentë penalë"
Ministri i Brendshëm, Sandër Lleshaj, i shoqëruar nga drejtori i përgjithshëm i Policisë, Ardi Veliu, inspektoi dje sallën operative të Policisë së Tiranës, në lidhje me masat që janë marrë për festat e fundvitit. Pas inspektimit, Lleshaj deklaroi se forcat e Policisë tashmë kanë angazhim të shtuar, nisur edhe nga ngarkesa që sjell fundi i vitit në të gjitha drejtimet. Por, sipas tij, tri janë drejtimet kryesore që do të menaxhohen me masa shtesë nga Policia: kufiri, rendi dhe personat me precedentë penalë. "Aktualisht, Policia është e fokusuar në disa drejtime kryesore: e para në drejtimin e menaxhimit të të gjithë fluksit të kalimit në pikat tona kufitare, për arsye se fundi i vitit shton numrin e qytetarëve shqiptarë, që hyjnë apo dalin nga territori. Po kështu, vëmendje e madhe u kushtohet çështjeve të trafikut, sigurisë rrugore në përgjithësi, luftës kundër krimit, mbajtja në monitorim e elementëve me precedentë kriminalë, si edhe çështje që kanë të bëjnë me rendin publik. Kryesisht dhe fokus i veçantë i Policisë është çështja e ruajtjes së festës nga zhurmat, nga incidentet, nga shpërthimet, nga fishekzjarrët, nga kapsollat dhe gjithë elementet e tjera piroteknike, të cilat për vite të tëra kanë shqetësuar dhe kanë shkaktuar probleme të mëdha", tha Lleshaj. Duke i përmbledhur të gjitha këto prioritete, ministri Lleshaj tha se përpjekja për të siguruar qetësinë e festës është edhe parandalimi me vendosmëri të lartë i përdorimit të mjeteve piroteknike, të cilat në të kaluarën kanë shkaktuar shumë herë dëme deri në rrezikimin e jetës. "Unë gjej rastin dhe shfrytëzoj praninë tuaj për t'iu bërë thirrje të gjithë qytetarëve që të intensifikojnë bashkëpunimin me Policinë këto ditë. Me këtë nënkuptoj informimin për të gjithë ato raste, të cilat shqetësojnë sigurinë publike dhe qetësinë publike. Policia e Shtetit është e angazhuar me një prani të shtuar në territor për t'iu përgjigjur çdo shqetësimi qytetar dhe e rëndësishme mbetet që qytetarët të bashkëpunojnë, pra të informojnë Policinë e Shtetit përmes të gjithë kanaleve, që janë të gjitha funksionale, qoftë përmes 112- ës dhe numrave të tjerë, qoftë përmes aplikacionit ' Komisariati Dixhital', apo në rrugë të tjera, në mënyrë që të garantojmë që festat të zhvillohen në qetësi të plotë, ashtu siç duhet dhe të evitojmë çdo incident apo çdo person, i cili mundohet të shfrytëzojë nganjëherë festat për të bërë edhe veprimtari të dëmshme", u shpreh Lleshaj. Sipas tij, një numër i madh i punonjësve të Policisë së Shtetit nuk do të kenë festë, por shërbim. Për këtë arsye, ai kërkoi bashkëpunimin e qytetarëve, duke i ftuar që t'i telefonojnë Policisë së Shtetit dhe i siguroi se efektivët do jenë në kohën e duhur aty ku është e nevojshme. I pyetur se si e vlerëson rendin dhe sigurinë gjatë vitit që tashmë po kalon, Lleshaj tha se ka qenë një vit me tregues optimistë. "2019- ta ka qenë një vit i ngarkuar, e dini më mirë sesa unë ngarkesën që ka pasur Policia e Shtetit. Mund të themi që po i afrohemi mbylljes së vitit me tregues mjaft optimistë, sa i përket progresit të bërë", tha ai.