Tregti droge e fishekësh të ‘ Fresku’, pranga 27- vjeçarit
Në shtëpi i gjenden 40 kuti të mbushura me municion luftarak
Policia e Tiranës ka finalizuar dje një tjetër operacion për goditjen e shpërndarjes së lëndëve narkotike në doza të vogla dhe të municionit luftarak.
Operacioni policor i koduar "Fresku", u zhvillua nga Komisariati i Policisë Nr. 4, në bashkëpunim me Seksionin për Hetimin e Narkotikëve në Policinë e kryeqytetit. Gjatë këtij aksioni u sekuestrua lëndë narkotike, një sasi e madhe municion luftarak dhe fitil zjarrpërcjellës. Policia tha se është vënë në pranga një 27- vjeçar, i dyshuar për tregtim të lëndë narkotike dhe municion luftarak. Arrestimi i tij u krye në vijim të punës për kontrollin e territorit, kapjen e personave që shpërndajnë lëndë narkotike apo që posedojnë armë zjarri e municion luftarak. Shërbimet e Komisariatit të Policisë Nr. 4, në bashkëpunim me Seksionin për Hetimin e Narkotikëve në Drejtorinë Vendore të Policisë Tiranë, në bazë të informacioneve të siguruara në rrugë operative nga burime të ndryshme, finalizuan operacionin e koduar "Fresku", në kuadër të të cilit u bë kapja dhe arrestimi në flagrancë i shtetasit Sami Sida, 27 vjeç, nga Zall - Bastar, banues në Selitë.
OPERACIONI Nga ana e Seksionit për Hetimin e Narkotikëve të
Drejtorisë Vendore të Policisë Tiranë, në bashkëpunim me Komisariatin Nr. 4, janë marrë informacione në rrugë operative se shtetasi Sami Sida tregtonte lëndë narkotike kannabis sativa për shtetas të ndryshëm, përdorues të saj, në zonën e "Freskut", në kryeqytet, si dhe tregtonte municion luftarak. Mbi bazën e këtyre informacione, u organizua puna për kapjen e tij në flagrancë. Nga kontrolli i ushtruar ndaj 27- vjeçarit Sami Sida, në rrugën "Qemal Deliu", është gjetur një sasi lënde e dyshuar kannabis sativa. Menjëherë është ushtruar kontroll në banesën e tij, në rrugën "Muhamed Deliu", ku është gjetur dhe një qese e mbushur me kanabis, gjithsej 836.6 gramë. Nga veprimet e para hetimore rezultoi se ky shtetas kishte dhe një banesë në fshatin Selitë të Tiranës dhe nga kontrolli në këtë banesë janë gjetur dhe sekuestruar 40 kuti kartoni të mbushura me fishekë luftarak, 8 karikatorë ( gjithsej 1318 fishekë) dhe fitil zjarrpërcjellës. "Materialet procedurale i kaluan Prokurorisë së Tiranës, për veprime të mëtejshme hetimore, për veprat penale ' Mbajtja pa leje e armëve shpërthyese dhe e municionit' dhe ' Prodhimi dhe shitja e narkotikëve'", tha zyrtarisht Policia.