Karburanti përfshihet nga flakët në Kombinat, pas përplasjes së motorit
Një pikë karburanti u përfshi nga flakët pasditen e djeshme në zonën e Kombinatit, pasi një motor u aksidentua duke kaluar mbi bombolën e mbushur me 200 litra gaz. Fatmirësisht, nga ngjarja nuk pati persona të lënduar, por edhe ndërhyrja në kohë e zjarrfikëses bëri që të parandalohej një shpërthim i madh. Ngjarja ndodhi në orën 18: 46 në rrugën "Llazi Miho", kur në karburant shpërtheu dhe mori flakë një bombol gazi që shërbente për furnizimin me gaz të automjeteve. Menjëherë pas njoftimit të marrë për ngjarjen, forca të shumta Policie dhe disa zjarrfikëse shkuan në vendngjarje, ku bënë të mundur fikjen e plotë të zjarrit duke shmangur plotësisht rrezikun e përfshirjes së mëtejshëm të tij. Drejtori i zjarrfikësve, Shkëlqim Goxhaj, ka folur për flakët e stërmëdha që u përhapën mbrëmë pranë karburantit në Kombinat të Tiranës.
Në një prononcim për "News 24", Goxhaj tha se shkak për zjarrin dyshohet përplasja e një mjeti motor me depozitën e gazit. Ai shtoi se janë mobilizuar forcat zjarrfikëse, të cilët shuan flakët. Bëhet me dije se nuk ka pasur asnjë shpërthim në karburant, por ka pasur flakë si pasojë e përplasjes. Bombola e gazit përmban 200 litra. Motori ka kaluar sipër bombolës. Ende nuk dihet gjendja e depozitës, kurse karburanti nuk ka dëmtime. Ai shton se shpërthimi i mundshëm është parandaluar. Policia mori masa duke vendosur perimetrin e sigurisë e largimin e të gjithë qytetarëve nga perimetri i sigurisë, si dhe bllokimin e aksit rrugor, duke i menaxhuar e drejtuar për në akse të tjera lëvizjeje.