Petrit Ruka: Tmerr artistik
Diskutimit të poetes Rita Petro e të personaliteteve të tjera të artit mbi poezitë e këngëve të këtij viti, i është bashkuar edhe poeti e kineasti Petrit Ruka. Ndërsa ka publikuar në rrjetet sociale tekstin e këngës “Me tana” të Elvana Gjatës, Ruka ka është shprehur i irrituar për gjendjen e mjeruar, në të cilën ka rënë, sipas tij, Festivalit i Këngës. “T’i kam fal ty me tana/ Me tana o me tana/ Dashni me fal/ O kush ka me ma nal?/ A ma thua edhe sa/ Duhet të pres ty me të pa/ Ta di, dua ta di dhe sa/ Kohën ndale, ndale/ Të shkoj ngadale ndale / O më ngadale ndale” ( teksti i këngës së Gjatës). Statusi i plotë: “5 milionë shqiptarë paguajnë RTSH për ndyrësi të tilla dhe na na na- n e saj… Tmerr artistik. Organizatorët e këtij festivali duheshin ‘ arrestuar’ në sallë për krim ndaj gjuhës shqipe dhe fyerje të rëndë të dinjitetit të kulturës kombëtare shqiptare. Duhet hartuar me ngut një ligj i posaçëm që këngët në Festivalin e RTSH duhet të vijnë patjetër në standard dhe të kenë poshtë firmën aprovuese të dhjetë poetëve më të mirë të vendit. Unë vetë nuk do ta pranoja këtë tekst edhe sikur të vinte me muzikën e Ennio Morricone- s. Turpi e mbuloftë emrin e atyre regjisorëve, udhëheqësve artistikë, prezantuesve, redaktorëve, kompozitorëve që kanë emrin në titrat e këtij produksioni me tekste të tilla. Një ditë, bota do të qeshë me të madhe me idiotësinë e tyre. Tallja e brezave që vijnë do t’i shoqërojë edhe aty ku do të jenë, në varr”.
Bashkëshortja e Feim Ibrahimit: Nuk po ia gjej fillin këtij lëmshi
Duke falënderuar Rukën për reagimin, bashkëshortja e kompozitorit të njohur Feim Ibrahimi, Vera, është shprehur me pesimizëm për gjendjen e artit, duke u kërkuar artistëve të vërtetë të marrin në dorë situatën. “Më është neveritur gjithçka e nuk po ia gjej fillin këtij lëmshi të pashoq artistik e jo më moral. Njerëz, nëse falimenton arti, ne falimentojmë shpirtërisht, falimentojmë si komb, mbetemi pa identitet… Rrezikojmë të falimentojmë nga çmenduria e pakonceptueshme e atyre që kërkojnë ta shkatërrojnë medoemos artin shqiptar”, shprehet ajo, duke këmbëngulur se artistët, kompozitorët dhe poetët e vërtetë duhet ta ndryshojnë rrjedhën e kësaj situate kritike. “Të ngrihet në këmbë një sallë e tërë për të duartrokitur fort banalitetet e shëmtira të tilla, domethënë se arti i vërtetë u mbyt nga injoranca”, shton bashkëshortja e kompozitorit.