Basha mbledh Kolegjin e Kryetarëve: Në janar Kodi i ri Zgjedhor dhe plani ekonomik

“Grupe pune që të identifikojnë çdo familje të prekur nga tërmeti, veçanërisht ato që nuk janë ndihmuar”

Kryetari i Partisë Demokratike, Lulzim Basha, ka porositur Kolegjin e Kryetarëve të PD- së që të jenë gati për zgjedhje të parakohshme.

Dje, kur u shënua një muaj nga tërmeti i fuqishëm i 26 nëntorit, kreu i selisë blu mblodhi pasdite Kolegjin e Kryetarëve për t’u dhënë porositë e fundit me gjasë për këtë vit. Takimi u zhvillua me dyer të mbyllura, por sipas burimeve mësohet se zgjedhjet e parakohshme kanë qenë një nga temat kryesore që është diskutuar mes kryedemokratit Basha dhe Kolegjit të Kryetarëve. Teksa ka sulmuar qeverinë se është në ditët e saja më të dobëta të qeverisjes, kreu i selisë blu ka vijuar duke thënë se vetëm zgjedhjet e parakohshme dhe të ndershme mund ta nxjerrin vendin nga kriza. Më tej, sipas burimeve, kreu i selisë blu u ka thënë kryetarëve të degëve se vendimi që mori opozita në shkurt për të djegur mandatet kishte mbetur e vetmja rrugë për të nxjerrë në pah abuzimet e qeverisë së Kryeministrit Rama. “Ne duhet të bëhemi gati me projektin tonë, me alternativën, të organizohemi për zgjedhje të parakohshme. Zgjedhjet janë e vetmja mënyrë për ta nxjerrë vendin nga kriza politike dhe ekonomike ku është futur dhe po thellohet çdo ditë e më shumë”, mësohet të ketë thënë Basha para Kolegjit të Kryetarëve. Më tej, kreu i selisë blu u ka kujtuar të pranishmëve kushtet e Bundestagut, ku ndër to ka veçuar Reformën Zgjedhore dhe zgjedhjet e parakohshme. Bllokimi i zgjedhjeve, sipas kryedemokratit, pengon edhe rrugën e integrimit të Shqipërisë në BE. “Zgjedhjet janë po ashtu kusht dhe për avancimin e projektit europian të Shqipërisë. Ne jemi në përfundim të programit tonë ekonomik për ta nxjerrë vendin nga kriza”, ka thënë Basha. REFORMA ZGJEDHORE

Muaji i parë i vitit të ri duket se do të nisë me intensitet në selinë blu. Kryedemokrati Lulzim Basha ka deklaruar para Kolegjit të Kryetarëve dje pasdite, se në janar grupi i punës do të përmbyllë paketën e Reformës Zgjedhore të opozitës dhe do të kërkojë që paketa konsensuale të miratohet brenda janarit, në mënyrë që t’u hapet rruga zgjedhjeve të parakohshme. “Pas festave ne do të prezantojmë para qytetarëve propozimet tona për Reformën Zgjedhore dhe kërkojmë që brenda muajit janar të miratohet reforma e t’u hapet rrugë zgjedhjeve vendore dhe të përgjithshme sa më shpejt, pasi kjo qeveri po e thellon krizën ekonomike, politike dhe shoqërore”, ka thënë Basha. Më tej paketa e Reformës Zgjedhore do t’i nënshtrohet një konsultimi brenda strukturave të PD- së në një periudhë të shkurtër, pasi brenda janarit kreu i selisë blu kërkon që Kodi i ri Zgjedhor të miratohet. “Pas prezantimit, këto propozime do t’i nënshtrohen një konsultimi të gjerë për të marrë mendimin e anëtarësisë dhe qytetarëve edhe për sa u përket aspekteve të tjera të reformës, siç është sistemi zgjedhor”, ka thënë Basha. Ndryshimi i sistemit zgjedhor është një kërkesë e përsëritur e aleatëve të vegjël, që i bëhet kryetarit të Partisë Demokratike. Ndërkohë, sipas burimeve nga selia e PDsë, mësohet se ndryshimi i sistemit nuk është një nga prioritetet kryesore të PD- së. Po të njëjtat burime pohuan se qëllimi kryesor i kësaj reforme është largimi i krimit nga politika dhe reflektimi i rekomandimeve të OSBE/ ODIHR- it.

Ndërkohë, nuk dihet me siguri nëse grupi i punës i ngritur nga opozita e bashkuar rreth dy muaj më parë të ketë në draftin e saj një opsion të sistemit zgjedhor. PAKETA EKONOMIKE

Një tjetër temë që u cek nga kryedemokrati Lulzim Basha në mbledhjen me Kolegjin e Kryetarëve pasditen e djeshme ishte edhe paketa ekonomike e PD- së, që sipas Bashës do ta nxjerrë vendin nga kriza e rëndë ekonomike. Para tërmetit të fuqishëm të 26 nëntorit, kryedemokrati nisi një tur bashkëbisedimi me biznesin dhe fermerët, por tragjedia që preku vendin bëri që kreu i selisë blu ta ndërpriste bashkëbisedimin. Ndërkohë Basha u ka thënë kryetarëve të degëve se pas pushimeve të fundvitit do të prezantojnë edhe paketën ekonomike. “Në fillim të janarit do të prezantojmë paketën ekonomike të opozitës. Do të jetë alternativa jonë për të nxjerrë vendin nga kriza e rëndë ku ndodhet vendi. Grupet e punës janë pothuajse në fund të hartimit të saj”, ka vijuar më tej Basha.

TËRMETI Në ditën që shënoi një muaj pas tërmetit të fuqishëm që preku Shqipërinë, nuk mund të mos ishte objekt diskutimi edhe situata pas tërmetit në mbledhjen e kryetarit të PD- së me Kolegjin e Kryetarëve. Basha ka porositur të tijtë që të jenë pranë qytetarëve, në mënyrë që përmes denoncimeve të çojnë shqetësimin e tyre tek institucionet shtetërore. Basha ka porositur që të përqendrohen te disa kategori. “Duhet të jemi çdo ditë afër qytetarëve, duhet të jemi gjithnjë pranë tyre. Në degët e prekura nga tërmeti duhen ngritur menjëherë grupe pune që të identifikojnë çdo familje të prekur nga tërmeti. Këto grupe pune të identifikojnë ato familje që nuk u është ofruar asnjë ndihmë, që gjenden pa strehë në prag të dimrit. Të evidentohen familjet që nuk kanë vlerësim për banesat e tyre, apo kanë vlerësime kontradiktore, që jetojnë në objekte të shpallura të pabanueshme se nuk kanë ku të strehohen. Rast pas rasti, PD- ja duhet të bëhet zëri i tyre që të dëgjohen dhe t’u vihet në ndihme. Nuk mund të rrezikohet më jeta e qytetarëve. Është kriminale që banorët pas një muaji nga tërmeti s’kanë marrë asnjë ndihmë apo janë diskriminuar, se nuk kanë votuar më 30 qershor apo për shkak të bindjeve partiake”, ka thënë Basha. Më tej, kreu i selisë blu ka denoncuar padrejtësitë që po bëhen sipas tij me trajtimin me listë preferenciale të të dëmtuarve. “Partia Demokratike është kthyer në shpresë për çdo qytetar, pavarësisht bindjeve të tyre politike, pasi shohin degradim në çdo aspekt. Ne duhet të dëgjojmë zërin e qytetarëve, duhet të bëjmë konsultimin më të gjerë të ndodhur deri më sot, me të gjitha grupet shoqërore dhe në çdo cep te vendit, për të vendosur reagimin që do të kemi nëse kjo qeveri vazhdon të vjedhë, dhunojë dhe abuzojë bashkë me krimin qytetarët e këtij vendi”, ka përfunduar Basha.

Ne duhet të bëhemi gati me projektin tonë, me alternativën, të organizohemi për zgjedhje të parakohshme. Zgjedhjet janë e vetmja mënyrë për ta nxjerrë vendin nga kriza politike dhe ekonomike ku është futur dhe po thellohet çdo ditë e më shumë. Zgjedhjet janë po ashtu kusht dhe për avancimin e projektit europian të Shqipërisë. Ne jemi në përfundim të programit tonë ekonomik për ta nxjerrë vendin nga kriza