Festivali, flet kreu i RTSH dhe anëtari islandez i jurisë: Vendimi nuk diskutohet
Thoma Gëllçi: Debatet janë të natyrshme, së shpejti analiza
“Debatet janë të natyrshme, ndërsa vendimi i jurisë është i pavarur dhe i padiskutueshëm”.
Drejtori i Përgjithshëm i Radio Televizionit Shqiptar, Thoma Gëllçi, është shprehur i vendosur lidhur me rezultatin final të 5 anëtarëve të jurisë që gjykuan Festivalin e Këngës, duke nxjerrë në krye të listët këngën “Shaj”. Prononcimi i tij për “Panoramën” hedh poshtë aludimet për një marrëveshje të mundshme mes dy finalisteve Elvana Gjatës dhe Arilena Arës, apo propozimit për ngritjen e një jurie të re. Për sa u përket diskutimeve të mëtejshme profesionale lidhur me këtë çështje, Gëllçi shton se: “Siç është në traditën e RTSH- së, së shpejti do të zhvillohet analiza e festivalit që do të jetë e hapur për shtypin dhe publikun”. Edhe pse Festivali i Këngës çdo vit është pasuar me diskutime, në këtë edicion të 58të kjo skenë “e rrahur” nga erërat e showbiz- it zien më shumë se kurrë prej debatit. Ndonëse në natën finale, fituesja Arliena Ara u përqafua nga duartrokitjet e zjarrta të publikut, që miratuan në shumicë fitoren e saj, duke e kthyer 3 herë në skenë, postfestivali nuk qe kaq i qetë. Mbështetësit e ELvana Gjatës, e cila u rendit e dyta në këtë garë me këngën “Me tana”, nuk e kapërdinë kaq lehtë që “e preferuara” e tyre të mos ishte përfaqësuesja shqiptare në Eurovizion. Një situatë e tillë pasoi me fyerje për jurinë, që pas publikimit të votave patën në fokus poeten Rita Petro dhe etnomuzikologen Mikalea Minga, pasi votuan respektivisht me 8 dhe 2 pikë Gjatën. Një debat i tillë bëri që Petro të përgjigjej duke kërkuar një reagim publik të institucionit ( RTSH- së), që të konfirmohej edhe nga ana e tyre se për çdo gjë është proceduar në bazë të rregullave. Madje, duke theksuar se është ndjerë e fyer nga aludimet e bëra, ajo propozoi që vendimi të rishikohet. “Deri për Eurovizion ka kohë. Le të hetohet dhe nëse shikohet e nevojshme të ngrënë një juri tjetër e t’ia japin fitoren kujt mendojnë ata”, tha Petro. Nga ana tjetër, një ide e tillë dukej se nxitej edhe më shumë nga reagimi i moderatores, njëherazi edhe një prej organizatoreve, Alketa Vejsiut, e cila nëpër rrjetet sociale shprehet kundër vendimit, duke e konsideruar të turpshëm 2pikëshin e Mikaela Mingës. “2 pikët janë të turpshme, s’e di ç’ka lëvizur pas kësaj historie… S’janë 10 pikë apo 14, por 2. Në vend të ELvanës mund të ishte Kamela, Era Rusi, Albëria, madje edhe vetë Arilena ndoshta. Kauza ime, meritokracia, ranë në këtë festival, si të rri indiferente”, u shpreh ajo.