Loja me qeverinë në Kosovë, Kurti refuzon dy herë Thaçin
“Kam marrë sot dy ftesa, por s’e kam axhendën sot për sot”
Një ditë pas konstituimit të deputetëve të rinj të Kuvendit të Kosovës, Presidenti Hashim Thaçi i ka dërguar ftesë për takim kreut të partisë që u rendit e para në zgjedhjet e 6 tetorit, Albin Kurtit, për të diskutuar mbi qeverinë e re dhe mandatin e Kryeministrit.
Kurti dhe Thaçi nuk kanë pasur kurrë marrëdhënie të mira, por është detyrë kushtetuese e Presidentit ta thërrasë atë në zyrë si fitues i zgjedhjeve, për t’i dhënë mandatin e formimit të qeverisë. Të enjten, pak minuta pas mbylljes së seancës së parë të legjislaturës së shtatë të Kosovës, Thaçi ka shkruar një shkrim pajtues, duke iu bërë thirrje të gjitha palëve politike që të lënë mënjanë mëritë dhe të mendojnë për të ardhmen e vendit. Të premten ai ka dërguar dy ftesa për Kutin, por të dyja janë refuzuar, përkundër pritshmërisë së Presidentit. Refuzimi është komentuar nga analistët si një taktikë politike, që do t’i shërbejë Kurtit për të fituar kohë. Sipas rregullave, sapo mandatohet nga Presidenti, i mandatuari ka vetëm 15 ditë kohë për të paraqitur qeverinë e tij dhe për të marrë votëbesimin e ligjvënësve. Por në mënyrën se si kanë shkuar negociatat mes Kurtit dhe partnerit të vetëm qeverisës që mund të ketë ai pas zgjedhjeve të 6 tetorit, Isa Mustafës së LDK- së, gjasat për një marrëveshje kaq të shpejtë janë shumë të pakta. Dhe nëse Kurti nuk paraqet një qeveri brenda 15 ditësh, atëherë Presidenti ia kalon mandatin kreut të partisë së dytë, d. m. th. Isa Mustafës, i cili ka treguar edhe më parë që është i aftë të bëjë koalicione edhe me ata, që i ka konsideruar kundërshtarë të fortë politikë. Kjo do të thotë se mundësia që Mustafa të anashkalojë Kurtin dhe të kërkojë koalicione të tjera nëse nuk merret vesh me të, nuk mund të përjashtohet. Kështu, Kurtit i leverdis të fitojë kohë.
Ai i ka dërguar një përgjigje negative Presidentit për takimin, duke argumentuar se ndodhej jashtë Kosovës. Ftesën e parë Thaçi ia kishte dërguar për në orën 13: 30, nga e cila mori përgjigje negative pas arsyetimit të Kurtit se gjendet jashtë Prishtinës. Presidenti ka shkruar në “Twitter” se pas konstituimit të Kuvendit, për shkak të nevojës urgjente për të formuar sa më shpejt Qeverinë, e ka thirrur për ta mandatuar liderin e LVV- së, Albin Kurti. Thaçi ka shkruar se Kurti nuk ka shkuar në takim. Pavarësisht kësaj, Presidenti i vendit ka thënë se do t’i dërgojë një ftesë të re dhe ka bërë thirrje që sa më shpejt të formohen institucionet e Kosovës. “Unë përsëri u bëj thirrje të gjithëve të tregojnë udhëheqje dhe të mos vonojnë formimin e qeverisë së re të Republikës së Kosovës. Populli dhe aleatët tanë presin më shumë”, ka shkruar Presidenti Thaçi.
Pak orë më pas, Presidenti dërgoi një ftesë të dytë, për në orën 20: 00, e cila gjithashtu është refuzuar nga Kurti. Ky i fundit ka folur për mediat, duke treguar pse i ka refuzuar dy ftesat e Presidentit të Republikës së Kosovës. “Kam marrë sot dy ftesa, por axhenda e krerëve të shtetit është shumë e ngjeshur. Prandaj nuk mund të takohemi ashtu, përveç kur ka ndonjë fatkeqësi ose ndonjë urgjencë tjetër”, tha Kurti. Ai ka thënë se sigurisht që do të takohet me Thaçin, por që paraprakisht do të shqyrtojë nenet që janë përmendur. “Kam qenë në Shkup dhe unë nuk e kam axhendën sot për sot”, tha ai duke përdorur një nga motot e dëgjuara prej tij, se nuk duhet vonuar, por as nxituar. Kurti nuk ka munguar në takimin e fundvitit me gazetarët në Prishtinë, të organizuar nga partia e tij.