Kuvendi kërkon që çështja ‘ ÇEZ’ të kalojë në SPAK
Balla: Prokuroria nuk ka kryer asnjë veprim hetimor
Ndërkohë që Gjykata e Tiranës pritet të shqyrtojë kërkesën e Prokurorisë për pushimin e hetimeve për çështjen "ÇEZ", kreu i Grupit Parlamentar të PS, Taulant Balla, dorëzoi një kërkesë paraprake, duke kërkuar dërgimin e çështjes në Strukturën e Posaçme Antikorrupsion( SPAK), pasi veprat penale të dyshuara dhe përfshirja e disa zyrtarëve në të, e bënë të jetë në kompetencën e Prokurorisë së Posaçme. Kërkesa do të shqyrtohet dhe jepet një vendim në datën 26 janar. Ndërkohë, jashtë ambienteve të Gjykatës së Tiranës foli Taulant Balla. Ky i fundit u shpreh se Prokuroria nuk ka kryer asnjë veprim hetimor dhe se çështja duhet t'i kalojë SPAK- ut për arsye kompetence. "Kemi të bëjmë me disa vepra penale, një pjesë e të cilave nuk mund të jenë më objekt i hetimit dhe gjykimit nga Prokuroria dhe Gjykata e Tiranës, por në SPAK dhe GJKKO dhe për pasojë, unë si ish- kryetar i atij komisioni, jam sot në Gjykatë me përfaqësuesit e Kuvendit. Të gjendur në këto kushte, ku nuk janë bërë hetime dhe nuk është marrë në pyetje dëshmitari kyç, Nuel Kalaj, i cili ka tërhequr në ditën për diell 6 milionë euro. Ai nuk është marrë fare në pyetje. Kjo nuk mund të jetë më një çështje që gjykohet nga Gjykata e Tiranës. Kërkesa jonë i është paraqitur gjyqtarit. Prokuroria nuk ka kryer asnjë veprim hetimor. Nuk mund të mjaftohet me një letërporosi në Kosovë dhe të mbyllet çështja se ky person nuk gjendet. Ai është person me dalje publike në Kosovë. Në këto kushte, kjo çështje nuk mund të mbyllet. Bëhet fjalë për të vetmen çështje kur Kuvendi ka dalë me një vendim dhe ashtu si e parashikon ligji, i është dorëzuar Prokurorit të Përgjithshëm dhe sot me ndryshimet e reja duhet t'i takojë GJKKO- së. Reforma në Drejtësi ka garantuar që në Shqipëri të kemi një
Gjykatë dhe Prokurori funksionale", tha Balla. Në kallëzimin e bërë, Komisioni Hetimor i Kuvendit ka arritur në përfundimin se një sërë zyrtarësh të lartë të shtetit shqiptar gjatë viteve 2005- 2013, duke qenë persona që ushtronin funksionet më të larta publike, me veprime aktive dhe mosveprime kanë synuar dhe realizuar ardhjen e pasojave të kundërligjshme gjatë procedurave të privatizimit të Operatorit të Sistemit të Shpërndarjes, duke i shkaktuar shtetit një dëm të konsiderueshëm.