Këshilli mbron Krajën e Dumanin: Pretendimet e ngritura nuk janë ligjore
Këshilli njoftoi se prokurorët e posaçëm kaluan me sukses testet për lidhjet me ish- Sigurimin, figurën, pasurinë dhe profesionalizmin
Pas akuzave publike të bëra ndaj dy anëtarëve të Strukturës së Posaçme Antikorrupsion, Arben Krajës dhe Altin Dumanit, ka reaguar Këshilli i Lartë i Prokurorisë me anë të një deklarate për mediat.
Duke renditur dhe kujtuar se procesi i verifikimit për anëtarët e SPAK- ut ka zgjatur 9 muaj dhe është bërë në mënyrën më të mirë të mundshme, KLP- ja shpreh besim se janë zgjedhur më të mirët. Më tej, Këshilli thotë se në mënyrë që të krijohet një frymë besimi, është bërë e mundur përfshirja e publikut dhe faktorëve institucionalë. "Këshilli i Lartë i Prokurorisë ka ndjekur reagimet publike që kanë shoqëruar krijimin e Prokurorisë së Posaçme ( SPAK) dhe zgjedhjen e kreut të saj. Në çdo rast, ne priremi t'i konsiderojmë këto reagime si tregues të shqetësimeve të opinionit publik, të cilat meritojnë vëmendjen tonë. Duam të kujtojmë se procesi i përzgjedhjes së prokurorëve të SPAK- ut zgjati plot 9 muaj. Në përfundim të atij procesi konkurrues e transparent, ne jemi të bindur se kemi bërë më të mirën për të garantuar suksesin thelbësor të SPAK- ut, përmes përzgjedhjes së prokurorëve më të mirë. Nga ana tjetër, në një përpjekje për të krijuar atmosferën e duhur të besimit tek institucioni i ri, ne kemi bërë çmos për ta përfshirë publikun dhe të gjithë faktorët institucionalë në proceset vendimmarrëse të Këshillit për ngritjen e Prokurorisë së Posaçme", shkruhet në reagim.
IMAZHI
Në reagimin zyrtar, KLP- ja thotë se imazhi i SPAK- ut duhet të ngjallë besim të gjerë te publiku, ndërkohë konsideron të rëndësishme edhe të shkuarën e anëtarëve në suksesin e strukturës. "E kuptojmë se e shkuara personale dhe profesionale e prokurorëve të SPAK- ut është e rëndësishme për suksesin e tyre dhe të institucionit. Po ashtu, ne e kuptojmë se suksesi i SPAK- ut nuk do të përcaktohet thjesht dhe vetëm nga avantazhet procedurale dhe organizative të tij në krahasim me strukturat pararendëse. Imazhi publik i institucionit të ri dhe besimi që ai duhet të ngjallë te publiku i gjerë janë gjithashtu thelbësorë", njoftoi KLP.
VERIFIKIMI
Këshilli bëri të ditur dje se prokurorët kanë kaluar një sërë verifikimesh në kuadër të përzgjedhjes. Nga verifikimi për bashkëpunim me ish- Sigurimin e Shtetit, te kontaktet e papërshtatshme e deri te pasuria e profesionalizmi, Këshilli thotë se është bërë një verifikim i gjatë për kandidatët. "Në funksion të garantimit te këtij besimi, pa të cilin institucionet e drejtësisë nuk mund të funksionojnë, Shqipëria ndër vite ka miratuar ligje dhe ka ngritur institucione të specializuara, të cilat hedhin dritë mbi të kaluarën e prokurorëve të SPAK- ut. E kaluara e tyre është hetuar imtësisht në 4 rrafshe: Është verifikuar nëse kanë bashkëpunuar me strukturat famëkeqe të ish- Sigurimit të Shtetit në periudhën 29.11.1944 deri në 02.07.1991. Është verifikuar nëse kanë pasur kontakte të papërshtatshme me persona të përfshirë në krimin e organizuar gjatë periudhës së punës si prokurorë. Është verifikuar nëse pasuria e tyre është e ligjshme dhe është verifikuar nëse aftësitë e tyre profesionale janë të përshtatshme për ushtrimin e funksionit të prokurorit", përfundon KLP- ja.