Ndihma për tërmetin, Meta dekoron Pacollin me titullin “Nënë Tereza”
Presidenti i Republikës, Ilir Meta, nderoi dje me dekoratën e lartë "Nënë Tereza", ministrin e Jashtëm në detyrë të Kosovës, Behgjet Pacolli. Dekorata iu akordua Pacollit pas kontributit humanitar që tregoi për popullin shqiptar pas tërmetit të 26 nëntorit. "Për kontributin e spikatur humanitar dhe ndjeshmërinë e lartë të treguar ndaj popullit të Thumanës dhe të mbarë Shqipërisë, si shembull i solidaritetit kombëtar, pata sot kënaqësinë të vlerësoja me Dekoratën e lartë ' Nënë Tereza', politikanin, sipërmarrësin dhe filantropin e shquar të Kosovës, z. Behgjet Pacolli. Mirënjohje dhe vlerësim për kontributin humanitar të gjithë familjes Pacolli!", njoftoi Meta në "Facebook". Kreu i shtetit dekretoi po dje ligjin për përballimin e pasojave të fatkeqësive natyrore. Ai dekretoi edhe ligjin për përdorimin e procedurës së përshpejtuar për subvencionimin e pagesës së qirasë së banesës për familjet e mbetura të pastreha, si pasojë e fatkeqësisë natyrore, tërmetit të 26 nëntorit. Një tjetër ligj i dekretuar nga kreu i shtetit është ai "Për rivlerësimin e pasurisë së paluajtshme". Ndërkohë, gjatë ditës së djeshme, Presidenti Meta ka nderuar me titullin e lartë "Për merita të veçanta civile", mjekun Grei Malo, të cilin e ka cilësuar hero. Mjeku Malo zbriti në terren menjëherë pas goditjes së tërmetit tragjik të 26 nëntorit. "' Për merita të veçanta civile', mjekun hero Grei Malo, i cili zbriti në terren menjëherë pas goditjes së tërmetit tragjik të 26 nëntorit, duke hyrë nën rrënoja e duke shpëtuar jetë njerëzish në të gjitha zonat e dëmtuara, dhe spikati me kontributin e tij të veçantë humanitar si anëtar i Qendrës Vullnetare të Emergjencave Civile, për shpëtimin e të riut Klajdi Qato. Mirënjohje Grei
Malos që dha një shembull të jashtëzakonshëm të sakrificës dhe profesionalizmit, duke na bërë krenarë dhe gëzuar respektin e të gjithë shqiptarëve! Mirënjohje të gjithë anëtarëve të Qendrës Vullnetare të Emergjencave Civile!", shkroi Presidenti në "Facebook".