Rama: Në fshat jetojnë në çadra, sepse nuk duan të braktisin vendin

Nga Kamza, ku ishte në një nga familjet e strehuara në një banesë me qira, kreu i qeverisë iu është përgjigjur akuzave për lënien në çadra të shumë familjeve edhe në këto kohë që temperatura po zbresin ndjeshëm. Sipas Kryeministrit Rama, banorët në fshatra qëndrojnë në çadra pasi nuk duan të braktisin pronat dhe pasuritë që u kanë mbetur pas tërmetit të 26 nëntorit. "Më vjen keq për ata që janë në fshat dhe që për shkak se nuk duan të braktisin vendi e tyre, rrinë në çadra, por çadra është çadër, nuk është si shtëpi. Megjithatë, ne e kemi pjesë të punës që të durojmë edhe të sharat dhe shpifjet e atyre që thonë se i kemi lënë ne", tha Kryeministri. Kreu i qeverisë dhe kryebashkiaku i Kamzës, Rakip Suli, vizituan dje familjen Lleshi prej 8 anëtarësh, të cilët momentalisht janë akomoduar në një banesë me qira pasi shtëpia e tyre pësoi dëmtime serioze pas tërmetit me magnitudë 6.4 i shkallës rihter. Teksa ka folur me familjarët, Kryeministri Rama nuk i ka kursyer batutat edhe me fëmijët e shtëpisë, njërit prej të cilëve i pëlqen piktura. Rama e ka këshilluar që të mos heqë dorë nga piktura se sido që të jetë puna, nevoja për bojaxhinj është gjithmonë. "Mos e ndaj pikturën. Do bëhesh bojaxhi si puna ime. E ke një zanat në xhep, sido që të vijë puna, gjithmonë ka nevojë për bojaxhi. Se gjithmonë duhet", tha Kryeministri. Ky nuk ishte i vetmi moment që Kryeministri Rama ka shkëmbyer batuta me familjarët. Një moment tjetër ishte kur Rama dhe kryebashkiaku i Kamzës, Rakip Suli, po largoheshin dhe zonja e shtëpisë, sipas traditave të familjeve shqiptare, ka tentuar t'i japë një ëmbëlsirë, por që nuk është pranuar nga ky i fundit, me pretendimin se është i ëmbël vetë dhe ka marrë një portokall. Porosia e fundit kur doli nga shtëpia ishte për fëmijën që pëlqente pikturën: "Mos harro! Të gjitha këto shtëpi që do bëhen, kanë nevojë për bojaxhi", tha Rama. Pas tërmetit të fuqishëm, Kryeministri Rama emëroi ish- ministrin e Financave, Arben Ahmetaj, si ministër të rindërtimit. Në buxhetin e vitit 2020, qeveria ka planifikuar rreth 200 milionë dollarë për rindërtimin e objekteve të shembura, ku 130 milionë nga këto janë parashikuar të alokohen nga shteti dhe 70 milionë nga donatorët. Buxheti pritet të rritet në vazhdim nga donatorët.