Të dënuarit në Itali duan të vuajnë dënimin në Shqipëri

Rreth 192 kërkesa nga të dënuar shqiptarë në Itali, që duan të vuajnë dënimin në Shqipëri, kanë mbërritur në Ministrinë e Drejtësisë dhe i janë përcjellë Prokurorisë së Përgjithshme. Lajmi bëhet i ditur nga ministrja Etilda Gjonaj gjatë një takimi me gazetarët këtë të premte. Më herët, një gjë e tillë është komunikuar nga Kryeministri italian, Guiseppe Conte, gjatë konferencës së përbashkët në Romë me Kryeministrin Edi Rama. Gjatë kësaj konference në tetor, Conte tha se ishte arritur një marrëveshje midis dy shteteve për këtë çështje dhe transferimi i të burgosurve shqiptarë kishte nisur tashmë. Kryeministri italian theksoi se në vijim do të ketë edhe transferime të tjera të të burgosurve nga Italia për në Shqipëri. Ndërkohë, ministrja Gjonaj tha dje se aktualisht sistemi i burgjeve nuk ka kapacitet që të sistemojë këta të dënuar në të njëjtën kohë, por do ta bëjë duke i ndarë në fasha. "Është e pamundur për akomodimin e tyre në të njëjtën kohë, por do të fillojmë me fasha", tha Gjonaj. Më tej, Gjonaj tha se Shqipëria dhe Mbretëria e Bashkuar janë në fazën përmbyllëse të marrëveshjes për transferimin e të dënuarve. Edhe në Britani është një numër i lartë i shqiptarëve të dënuar. Gjithashtu, është duke u bërë edhe një rifreskim i marrëveshjes së ekstradimit që Shqipëria ka me Shtetet e Bashkuara të Amerikës. "Jemi në fazën e mbylljes së një marrëveshjeje për ekstradimet me SHBA. Do jetë një marrëveshje historike pasi operojmë ende me marrëveshjen e 1933", tha ministrja Etilda Gjonaj.