Pensionet, emrat e rinj të ISSH që marrin shtesën

ISSH miratoi dje 676 emrat e rinj të pensionistëve që marrin shtesën deri në 5 mijë lekë. Gazeta boton listën e minatorëve, metalurgëve e naftëtarëve sipas qyteteve

Instituti i Sigurimeve Shoqërore ka përfunduar përllogaritjet për një tjetër listë pensionistësh nga radhët e minatorëve, naftëtarëve dhe metalurgëve që përfitojnë shtesë deri në masën 20%.

Gazeta boton emrat e 676 përfituesve nga të gjitha qytetet e vendit, të cilët kanë aplikuar për të marrë shtesën e re duke nisur nga ky muaj. Ata që kanë emrin në listë mund të paraqiten pranë pikës së shpërndarjes për të bërë tërheqjen.

PËRFITUESIT

Jo të gjithë mund të përfitojnë nga skema suplementare që parashikon ligji nr 28/ 2019. Që në titull, ai përcakton kategoritë që marrin shtesën që shkon deri në pesë mijë lekë në muaj. Bëhet fjalë vetëm për minatorë, naftëtarë dhe metalurgë që kanë kryer punë të klasifikuara si të vështira dhe shumë të vështira. Një tjetër kusht janë vitet e punës, që nuk duhet të jenë më pak se gjashtë të tilla brenda sektorit, përkatësisht në nëntokë, metalurgji apo industrinë e naftës e gazit. Ndonëse janë bërë publike kategoritë si edhe kushtet që duhen plotësuar për të përfituar, sërish ka paqartësi nga radhët e pensionistëve. Ka nga ata që kanë aplikuar duke mos qenë përfitues të skemës, si dhe të tjerë që nuk janë paraqitur për të dorëzuar kërkesë, pavarësisht se preken nga ndryshimet. Në këto kushte, ISSH nuk ka mbyllur procesin e aplikimeve. Kjo do të thotë që çdo pensionist nga radhët e 3 kategorive, përkatësisht minatorë, naftëtarë dhe metalurgë që plotëson kushtet e mësipërme, pra, ka mbi 6 vite punë dhe ka ushtruar profesione të vështira, atëherë mund të paraqitet pranë çdo drejtorie për të dorëzuar kërkesë. Krahas kërkesës duhet edhe kopje e kartës së identitetit dhe çdo dokument tjetër që vërteton vitet e punës.