Shtesa e pensioneve, lista e dytë e përfituesve
Emrat e 341 pensionistëve që përfitojnë deri në 20 për qind shtesë nga radhët e minatorëve, metalurgëve e naftëtarëve. Kushtet që përmbushen
Gazeta boton sot listën e dytë me emrat e pensionistëve, që përfitojnë rritje nga 12 deri në 20 për qind mbi masën e pensionit.
Bëhet fjalë për ata që kanë punuar në miniera nëntokë, në industrinë e naftës dhe gazit e metalurgji. Instituti i Sigurimeve Shoqërore ka përfunduar përllogaritjet dhe ata që gjejnë emrin në listën e mëposhtme, mund të paraqiten nga kjo e hënë pranë pikës së shpërndarjes për të bërë tërheqjen e shumës së pensionit për muajin dhjetor dhe pesë muajt paraardhës, kur është miratuar ligji për trajtimin financiar të këtyre kategorive të lartpërmendura. Por, nuk mjafton thjesht të kesh punuar në një nga tri sektorët e mësipërm për të përfituar shtesën që shkon deri në pesë mijë lekë në muaj. Kusht është puna e klasifikuar si e vështirë dhe shumë e vështirë, e cila duhet të ketë zgjatur minimalisht gjashtë vite, përkatësisht në nëntokë, metalurgji apo industrinë e naftës e gazit.
SI PËRFITOHET
Ndonëse janë bërë publike kategoritë si edhe kushtet që duhen plotësuar për të përfituar, sërish ka paqartësi nga radhët e pensionistëve. Ka nga ata që kanë aplikuar duke mos qenë përfitues të skemës, si dhe të tjerë që nuk janë paraqitur për të dorëzuar kërkesë, pavarësisht se preken nga ndryshimet. Në këto kushte, ISSH nuk ka mbyllur procesin e aplikimeve. Kjo do të thotë që çdo pensionist nga radhët e 3 kategorive, përkatësisht minatorë, naftëtarë dhe metalurgë që plotëson kushtet e mësipërme, pra, ka mbi 6 vite punë dhe ka ushtruar profesione të vështira, atëherë mund të paraqitet pranë çdo drejtorie për të dorëzuar kërkesë. Krahas kërkesës duhet edhe kopje e kartës së identitetit dhe çdo dokument tjetër që vërteton vitet e punës.