Simbolet kombëtare në Mal të zi, Meta: Hap i rëndësishëm
"U garanton komunave, ku shqiptarët përbëjnë 5 për qind të popullsisë, shënimin e festës kombëtare"
Presidenti i Republikës, Ilir Meta, e cilësoi hap të rëndësishëm miratimin nga Parlamenti i Malit të Zi të ligjit që u lejon shqiptarëve përdorimin e simboleve kombëtare.
Në "Facebook", Presidenti Meta ka përshëndetur miratimin e ligjit, ndërsa e konsideron si një hap të rëndësishëm për respektimin e të drejtave të pakicave. "Përshëndes miratimin në Kuvendin e Malit të Zi të ligjit për zgjedhjen, përdorimin dhe shfaqjen publike të simboleve kombëtare për t'iu garantuar pakicave kombëtare e drejta dhe liria e zgjedhjes, përdorimit dhe vendosjes publike të simboleve kombëtare, si dhe kremtimi i festave të tyre kombëtare. Ky ligj, që priste miratimin që prej vitit 2017, u garanton komunave ku shqiptarët përbëjnë 5% të popullsisë shënimin e festës kombëtare. Një hap i rëndësishëm në drejtim të respektimit të të drejtave të pakicave dhe në dobi të forcimit të kohezionit social dhe kontributit të tyre në ndërtimin e shtetit të së drejtës. Përgëzime jo vetëm partive politike shqiptare, por të gjithë institucioneve në Malin e Zi, që kontribuuan në miratimin e këtij ligji të rëndësishëm", shkruan Presidenti Meta. Me 41 vota pro, projektligji i hartuar nga
Ministria për të Drejtat e Njeriut dhe Pakicave në Malin e Zi, garanton edhe përdorimin e lirshëm të flamurit shqiptar, nga shqiptarët e Malit të Zi, ndërkohë që është fshirë totalisht neni 23, për rendin dhe qetësinë publike, përmes të cilit sanksionohej përdorimi i flamurit shqiptar. Duke u bazuar në këtë ligj, vitet e fundit janë gjobitur shumë shqiptarë të Malit të Zi, që kishin përdorur flamurin shqiptar. Ministri për të drejtat e njeriut dhe pakicat, Mehmed Zenka, tha se miratimi i këtij ligji do të forcojë vlerën multinacionale të Malit të Zi. Ai tha se miratimi i projektligjit do të forcojë të gjitha arritjet pozitive të Malit të Zi në dy dekadat e fundit. Nënkryetari i Kuvendit malazez, Genci Nimanbegu, tha se simbolet kombëtare janë pjesë e të drejtave themelore të njeriut, njësoj si e drejta e të shprehurit.