“Alo, jam Sarri”, Hysaj drejt Juventusit
Manovra në orët e vona, mbrojtësi drejt kampionëve të Italisë
Elseid Hysaj mbetet një beniamin i Mauricio Sarrit. Kanë punuar së bashku tek Empoli dhe te Napoli.
Kjo është edhe arsyeja se përse trajneri aktual i Juventusit kërkon që ta ketë sërish në ekip. Ai nuk bindet nga cilësitë që ka De Shiljo, madje u kritikua ashpër për aktivizimin e mbrojtësit italian në finalen e Superkupës, kur "Zonja" u mund 3- 1 nga Lacio. Për këtë arsye, Sarrit i duhet një futbollist i besueshëm që mund të luajë në të dy krahët dhe të njohë filozofinë e lojës së tij. Hysaj ka identikitin perfekt dhe sipas medias italiane, Juventusi është futur mes Napolit dhe Romës për të marrë shërbimet e 25- vjeçarit shqiptar. Shkodrani ka luajtur 146 ndeshje me Napolin që nga vera e vitit 2015, por sapo shkeli aty, Ançeloti gjërat u vështirësuan për të dhe ai e humbi vendin e titullarit. Ishte drejt kalimit te Valencia gjatë verës, por në fund presidenti i klubit, De Laurentis, ndërroi mendje dhe e mbajti në ekip shqiptarin. Kjo nuk ndryshoi situatën e Hysajt, që vazhdoi të qëndronte shumicën e ndeshjeve në stol me Ançelotin. Gjatë javëve të fundit ka pasur negociata të vazhdueshme mes
Napolit dhe Romës për transferimin e lojtarit aty, por siç raporton gazetari Çiro veneratio i televizionit lokal "calcionapoli24tv", dje në mbrëmje është futur Juventusi fuqishëm në lojë. "Bëhet fjalë për një ide që mund të konkretizohet në janar. Juvja ka ofruar De Shiljon, që, në fakt, e kërkon edhe PSG, por të shohim", ka deklaruar Venerato. Mësohet se është këmbëngulja e Sarrit për ta pasur sërish shqiptarin në dispozicion, duke qenë se sezoni është i gjatë dhe dëmtimet e shpeshta e kanë shoqëruar Juventusin gjatë këtij edicioni. Nëse mbrojtësi i Shqipërisë kalon te Juventusi, atëherë ky do të ishte një tjetër hap i madh në karrierë, ku ka mundësi të shpallet për herë të parë kampion i Italisë, por edhe të luftojë për të fituar Champions- in.