Zoran Zaev, pro Mini- Shengenit: Sjell Europën në Ballkan
"Është pjesë e detyrave të shtëpisë që kemi, para se të integrohemi në BE"
Ish- Kryeministri i Maqedonisë së Veriut, Zoran Zaev, ka dhënë shpjegime për iniciativën e vendeve të Ballkanit Perëndimor, e quajtur ndryshe si Mini- Shengeni Ballkanik.
Në një intervistë për "Deutsche Welle", Zaev e ka cilësuar atë si një përpjekje për të sjellë Europën në këto vende, në mënyrë që përgatitja për të hyrë në BE të bëhet më e thjeshtë. "Ne jemi të hapur për të gjitha iniciativat, që synojnë nxitjen e bashkëpunimit rajonal dhe përshpejtojnë procesin e integrimit në BE për të gjitha vendet e Ballkanit Perëndimor. Ky është një proces autentik i vendit tonë, Shqipërisë dhe Serbisë, ne u bëjmë shpejt thirrje vendeve të tjera në rajon të na bashkohen. Iniciativa për bashkëpunim më të thellë rajonal nuk është pronë ekskluzive e askurrkujt apo një klub i mbyllur. Ne e kemi thënë nga fillimi, që ajo është e hapur për të gjitha vendet e Ballkanit Perëndimor. Nëse shikoni më nga afër deklaratat e mia për këtë iniciativë, do të vëreni se gjithmonë insistoj në atë që të përshpejtojmë bashkëpunimin. Po, gati të gjitha projektet janë të përfshira në CEFTA dhe Procesin e Berlinit, por ka një dallim të rëndësishëm. Te CEFTA dhe Procesi i Berlinit, bashkëpunimi ynë është gjithmonë i mbështetur e monitoruar nga një vend anëtar i BE- së. Në këtë rast, kjo është iniciativë e jona, autentike dhe imediate për t'i përshpejtuar këto procese. Ka shumë potencial të pashfrytëzuar në përshpejtimin e bashkëpunimit rajonal. Ne do të fitojmë më shumë respekt dhe mbështetje nga BEja nëse tregojmë lidership politik dhe përkushtim për nxitjen e bashkëpunimit me forcat tona. Unë besoj se nxitja e bashkëpunimit rajonal mund të japë një kontribut të rëndësishëm në shtensionimin e marrëdhënieve politike në rajon. Duhet të sjellim parimet europiane të bashkëpunimit dhe funksionimit në rajonin tonë. Ne duhet ta sjellim Europën në Ballkan, në secilin nga vendet tona. Kjo është një pjesë integrale e detyrave të shtëpisë që kemi përpara për t'u integruar në BE", tha Zaev. Por nga ana tjetër, ashtu si Rama në Shqipëri, edhe Zaev duhet përballet me shumë kundërshtarë të kësaj ideje. Disa politikanë shqiptarë dhe intelektualë me peshë në radhët e shqiptarëve të Maqedonisë e kanë kundërshtuar atë, duke e cilësuar si një kthim nën ndikimin rus për gjithë rajonin. Ndër kritikët më të ashpër janë deklaruar Kim Mehmeti, Ali Ahmeti dhe Zijadin Sela.