Arrestohet në Shkodër 20- vjeçari, iu gjet drogë e fshehur në banak
Policia e Shkodrës arrestoi një 20- vjeçar që u kap me drogë, ndërsa ka proceduar në gjendje të lirë një tjetër person, që merrej në mënyrë të paligjshme me baste sportive. Solingen Livanaj, banues në Shkodër, u kap me një sasi lëndë narkotike prej 93 gramësh. Policia e Shkodrës bën me dije se në kuadër të planit të masave për goditjen ndaj ushtrimit të lojërave të fatit të palejuara dhe për goditjen e personave që shesin lëndë narkotike në lokale, u arrestua në flagrancë një shtetas dhe ndiqet në gjendje të lirë një tjetër, ndërsa është sekuestruar sasia e lëndës narkotike në formë çokollate, kanabis sativa. Nga strukturat e Drejtorisë Vendore Shkodër, në kuadër të planit të masave për goditjen ndaj ushtrimit të lojërave të fatit të palejuara dhe për goditjen e personave që shesin lëndë narkotike në lokale dhe informacionit të marrë në rrugë operative, është bërë arrestimi në flagrancë i shtetasit Solingen Livanaj, për veprën penale "Prodhimi dhe shitja e lëndëve narkotike". Forcat policore kanë ushtruar kontroll në mjediset e një bar kafeje, në lagjen "Manush Alimani", Shkodër, pikërisht te pjesa e banakut, në raftin e pijeve është gjetur një qese me material në formë çokollate, Cannabis Sativa, me peshë 93 gramë dhe një peshore elektronike, për të cilën është bërë arrestimi në flagrancë i shtetasit të lartpërmendur, si dhe u bë sekuestrimi i lëndës narkotike në cilësinë e provës materiale. Gjithashtu, gjatë veprimeve të mëtejshme, shtetasit K. G., 25 vjeç, banues në Shkodër, i është gjetur në aparatin e tij celular një faqe web- i, e dyshuar si faqe sportive për loto, i cili ndiqet në gjendje të lirë për veprën penale "Organizimi i lotarive të palejuara". Burimet thanë se informacioni për shtetasin e arrestuar për sasinë e drogës është marrë në rrugë operative, duke mundësuar kështu prangosjen e tij, ndërsa gjatë kontrollit u gjet edhe faqja e basteve sportive në celularin e një të riu tjetër që ndodhej aty. Policia Vendore e Shkodrës bën të ditur se këto kontrolle do të vijojnë për parandalimin e veprimtarisë kriminale.