Pensionet, afatet për të marrë shtesën 5 mijë lekë
Zbardhen afatet për marrjen e shtesës deri në 5 mijë lekë për minatorët, metalurgët e naftëtarët. Katër listat zyrtare të ISSH, me 3662 përfituesit në gjithë vendin
Gati 20 mijë pensionistë kanë aplikuar në ISSH për të përfituar nga shtesa, e cila shkon mbi 5 mijë lekë për ata që kanë mbi 25 vite punë në sektorin e naftës, metalurgjisë apo në nëntokë.
Burime nga Instituti i Sigurimeve Shoqërore bëjnë me dije se deri më tani janë kryer rreth 3800 pagesa nga më shumë se 4500 dosje të marra në shqyrtim. "Deri në datën 22 dhjetor, janë dorëzuar 19930 kërkesa, ndërkohë që janë edhe rreth 900 kërkesa të bëra në ndërmarrjet e naftës, të cilët pasi të marrin dokumentet, do të drejtohen me kërkesë për pension. Deri më tani janë lidhur 4557 pensione shtesë dhe janë kaluar për pagesë 3733 persona. Kërkesat vazhdojnë, por tani janë më të pakta". Gjithsej janë 23 400 minatorë, naftëtarë dhe metalurgë, që përfitojnë. Procesi i aplikimeve nuk është i limituar. Kjo do të thotë që dorëzimi i kërkesës mund të bëhet në çdo kohë. Por avantazhi është që nëse aplikimi kryhet deri më 5 korrik të vitit 2020, pensionistët do të kenë mundësi të marrin edhe shtesën e 11 muajve paraardhës. Kjo, sepse ligji përcakton që efektet të nisin nga hyrja në fuqi e tij. Për ta bërë më të qartë, nëse do të ketë pensionistë që do të aplikojnë në muajin mars, ata do të kenë mundësi të marrin veç shtesës së muajit mars, edhe shtesën e 7 muajve paraardhës. Nëse do të aplikojnë në prill, do të marrin shtesën e 8 muajve paraardhës e kështu me radhë. Ndërkohë, nëse dorëzimi i kërkesës bëhet pas datës 5 korrik të 2020- s, efektet do të nisin prej momentit të aplikimit, pra hiqet mundësia e marrjes së shtesës për muajt paraardhës. Për procesin e aplikimit, krahas kërkesës, pensionistët duhet të dorëzojnë edhe një kopje të kartës së identitetit, si edhe çdo dokument tjetër që vërteton llojin dhe periudhën e punës për efekt pensioni.
FONDI
Shtesa për këto tri kategori varion nga 12 për qind deri në 20 për qind mbi masën e pensionit. Kjo, sepse ligji i miratuar në muajin qershor të këtij viti, parashikon që rritja për minatorët të bëhet me 1 për qind për çdo vit pune në nëntokë, ndërsa për naftëtarët dhe metalurgët, me 0.6 për qind. Këtë shtesë mbi pension, e përfitojnë të gjithë personat që kanë jo më pak se 6 vite në profesionet dhe punët e përcaktuara si të vështira dhe shumë të vështira. Për vitin që vjen, fondi në adresë të skemës suplementare kap vlerën e rreth 14 milionë dollarëve.
SKEMA
Në pesë vitet e para, kjo shtesë do të përballohet nga buxheti i shtetit dhe kostoja e përllogaritur është 140 milionë dollarë. Sipas ligjit, me pensione suplementare do të trajtohen ata ish- minatorë, naftëtarë dhe metalurgë, që kanë punuar në industrinë shtetërore dhe që punojnë në sektorin privat, por parashikohet që në vijimësi, punëdhënësit dhe punëmarrësit privatë të paguajnë kontribute shtesë në masën 5 për qind. Me këto kontribute parashikohet që të ulet gradualisht ngarkesa e Buxhetit të Shtetit deri në arritjen e përballimit të shtesës me kontribute. Gazeta boton sot të plota tabelat zyrtare të ISSH- së për dhjetorin, me 3662 emrat e pensionistëve, për të cilët është llogaritur shtesa dhe që mund ta përfitojnë atë në çdo pikë paguese sipas bashkive.