Të djathtët kërkojnë proporcional kombëtar me lista të hapura
Teksa opozita e bashkuar vijon ende diskutimet nëse do të ndryshojnë sistemin zgjedhor apo jo, dy deputetë të djathtë, Myslym Murrizi dhe Halit Valteri, dorëzuan pak ditë më parë në Parlament propozimin e tyre. Deputetët propozojnë që në Shqipëri të aplikohet proporcionali kombëtar me lista të hapura, ku e gjithë Shqipëria do të konsiderohet një zonë zgjedhore. Në këtë mënyrë, deputetët synojnë që të rrisin shanset që të zgjidhen në Kuvend edhe përfaqësues nga parti të vogla, për shkak të influencave lokale, gjë të cilën e minimizon aktualisht proporcionali rajonal që aplikohet tani. Ndërkohë, në një deklaratë për mediat, pasi dorëzoi propozimin për ndryshimin e sistemit zgjedhor, Myslym Murrizi u shpreh se Kryeministri Rama dhe kryedemokrati Basha nuk duan që të ndryshojë sistemi. "Ndryshimi i sistemit zgjedhor është i kërkuar nga të gjithë, përveç Ramës dhe Bashës, që nuk e duan, dhe një grushti butakësh që janë rreth tyre. Edhe shoqëria civile, edhe qytetarët kërkojnë që vota të shkojë të qytetari. Ne kërkojmë një sistem me lista të hapura, që qytetarët të zgjedhin, jo thjesht të votojnë. Nuk kam parë asnjë draft dhe nuk do ta shohë, pa u vendosur dora mbi plagë dhe pa ndryshuar thelbi që ka mahisur këtë krizë artificiale politike, që është sistemi zgjedhor. Të tjerat janë detaje teknike, që për mua janë të realizueshme brenda dy orësh", tha Murrizi pasi dorëzoi propozimin. Sakaq, mbetet për t'u parë se cili do të jetë qëndrimi i maxhorancës ndaj këtij propozimi, pasi në një dalje publike, bashkëkryetari i Komisionit të Reformës Zgjedhore, Damian Gjiknuri, e cilësoi legjitim propozimin, por shtoi se prioritet i PS- së është adresimi i shqetësimeve të OSBE/ ODHIR- it.