Tufa: U përballa me qentë e diktaturës komuniste
“Shmangia e Ramës nga përgjegjësia, mbrojtje e hapur e dhunëtarëve”
Ish- kreu i ISSK- së, Agron Tufa, edhe pse ndodhet prej disa javësh jashtë vendit në azil politik, vijon të prodhojë debat të fortë politik në Shqipëri. Pas deklaratave të Kryeministrit Rama se nuk bëhet fjalë për ndonjë konspiracion komunist ndaj një antikomunisti, ka ardhur reagimi i Tufës përmes rrjeteve sociale. Duke bërë një renditje të disa qëndrimeve publike të disa prej zyrtarëve më të lartë të PS- së për kërcënimin ndaj tij, Tufa rithekson se ai dhe gjithë shtresa e ishtë përndjekurve politikë kanë qenë totalisht të pambrojtur nga kërcënimet me jetë që iu janë bërë këto vite. “Edi Rama, kur sulmohesha e kërcënohesha unë, familja, puna ime në ISKK dhe e kolegut tim Çelo Hoxha, iu drejtova instancave më të larta të reagonin. Dhe reagimet institucionale ishin: Gramoz Ruçi - “Unë nuk jam kujdestar konvikti, që të thërras rojën ( deputetin Braho) e t’i tërheq vërejtje. Edhe mua më kërcënojnë” ( prill 2019); Edi Rama - “Ne do dërgojmë një Komision
Hetimor parlamentar në atë Institut, që të procedohet penalisht, nëse ka shkelur ligjin” ( 5 maj 2019); Taulant Balla - “Zotëri, nëse të kanë ofenduar, drejtohu në Gjykatë! Nëse të kanë kërcënuar, drejtohu në Prokurori! Edhe mua më kanë kërcënuar, por ja, dje isha në Gjykatë dhe i zgjidha problemet. Drejtoju organeve të reja të drejtësisë sonë” ( prill 2019); i provuam të gjithë dhe e pamë si heshtën me pathos e ton të lartë organet... të drejtësisë thoni ju? Jo, ata janë, si minimum, jo të drejtësisë. Thjesht organe... Edhe ato më të rejat fare, me hetues e prokurorë të komunizmit...
Edi Rama: “Nuk ka një konspiracion komunist kundër Tufës. Çdo vend ka të çmendur që kërcënojnë në telefona. Edhe mua më kërcënojnë” etj. ( 4 janar 2020). Të gjithë këta kërcënohen, por ne nuk jemi në postet dhe fuqinë e tyre. Ne dhe familjet tona nuk kemi imunitet, nuk i kemi me vete Ushtrinë, Policinë, sigurimsat, gjykatat, bandat, pasuritë, killerat, mediat dhe arrogancën. Ne jemi të pambrojtur përballë kësaj lukunie. Prandaj, mbrëmë, Kryeministri Edi Rama, duke shpërfillur dramatizmin e situatës sonë familjare, sapo rikonfirmoi marrjen në mbrojtje të “qenve të ish- Sigurimit dhe pitbullëve të drejtësisë enveriste, të cilët i ka zgjidhur nga zinxhiri i diktaturës, i ka bërë cerberët e pushtetit të tij. Po s’pati vallë gjë për të thënë Kryeministri as për deputetin e tij dhe ish- deputetin tjetër, që edhe pse gjendemi në azil, ata kërcënojnë e përbetohen kundër meje? Përbetohen se: “... do të të gjejmë dhe në vrimë të miut, atje ku ke kërkuar azil” ( Dita, 4 dhjetor 2019). Prandaj, si konkluzion: unë u përballa me qentë e tu të diktaturës, zoti Kryeministër. Mbetet vetëm një gjë: ose ti i ke marrë e duhej t’i bëje zap, ose ata kanë dalë jashtë kontrolli dhe nuk të binden më as ty! Sido që të jetë, është pikërisht kjo përgjegjësia jote direkte, të cilën duhet ta marrësh publikisht dhe ndërkombëtarisht mbi vete! Çdo shmangie prej kësaj përgjegjësie, siç bëre mbrëmë në RTSH, është mbrojtje e qartë dhe e hapur e dhunëtarëve të tu, është ndërsimi ndaj nesh i krejt zinxhirit të qenve të diktaturës”, shkruan Tufa në postimin e tij në “Facebook”.