Nga Venecia te votat për shkarkimin, Meta: Ka një plan për shpopullimin e Shqipërisë
"Presidenti shkarkohet kur janë 94 vota në Parlament dhe ata kanë 82 vota, si dhe 3 deputetët që nuk dorëzuan mandatet"
Presidenti i Republikës, Ilir Meta, sheh se ka një plan për shpopullimin e vendit nga maxhoranca, e cila sipas tij nuk po punon për integrimin e vendit në BE.
I ftuar në emisionin "Tempora" me gazetaren Sonila Meço në "Ora News", kreu i shtetit tha se Parlamenti i vendit nuk ka legjitimitetin dhe votat për ta shkarkuar atë, për shkak se vetëm 84 vota janë legjitime, ndërsa Gjykata Kushtetuese duhet të vërtetojë se Presidenti ka kryer tradhti ndaj atdheut.
Zoti President, Venecia ka pranuar kërkesën e maxhorancës, keni një koment?
Kjo është një gjë normale. Siç e kam konfirmuar edhe më parë, edhe unë si President do t'i drejtoj pyetjet e mia Venecias për dy emërimet që ka bërë Kuvendi në Gjykatën Kushtetuese.
Kur do ta bëni këtë?
Nuk kam asnjë afat, por e kam bërë të qartë që nëse ata do të bëjnë këtë veprim, unë do bëj veprim tjetër, për arsye se është e qartë se jo vetëm në rastin e parë Presidenti ka pasur të drejtë dhe ka respektuar Kushtetutën dhe kjo kërkesë është për të marrë në mbrojtje personin përgjegjës që ka shkelur Kushtetutën, Dvoranin, për të cilin ka dhe kallëzim nga Presidenti dhe njëkohësisht është dhe përpjekje për të mbajtur një fake çështje sepse nuk ekziston asnjë shkelje nga Presidenti. Ekzistojnë shkelje nga Dvorani dhe Kuvendi.
Do ta vazhdoni këtë çështje?
Unë e ndiej si një mision për vendin tim. Përderisa të tjerët e dezinformojnë vendin me fake, unë kam detyrimin që të jap informacione të sakta.
Komisioni i Venecias është thjesht organ këshillues...
Nuk ka asnjë shans që Venecia të hedhë në kosh emrin e vet, duke u përfshirë në këto lojëra të maxhorancës dhe për fat të keq, të disa ndërkombëtarëve që janë përfshirë në këtë çështje dhe i kanë dalë garant Dvoranit. Unë jam Presidenti, askush nuk e di më mirë se unë Kushtetutën. Gjykata Kushtetuese qëllimisht u asgjësua, por ata janë kapur në flagrancë. E gjykoj përpjekje për të mbrojtur një person që është në hetim nga Prokuroria dhe krimet e tij nga pikëpamja ligjore janë tepër flagrante. Në këtë histori, Presidenti është i vetmi institucion që ka përmbushur të gjitha detyrimet e ligjit dhe ka bërë përpjekje të sforcuar me institucionet, në mënyrë që të mos kishte përplasje dhe që çdo gjë të bëhej në parametrat normalë. Kjo është e qartë dhe gjithçka është një lojë politike. Duan ta fusin, la ta fusin Komisionin dhe unë do t'i drejtohem për dy votimet që ka bërë Parlamenti. Unë flas me Kushtetutën e Shqipërisë, në gjuhën shqipe.
I druheni fatit tuaj politik nga një shkarkim nga Parlamenti dhe Gjykata Kushtetuese?
Presidenti shkarkohet kur janë 94 vota në Parlament, ata kanë 82 vota, votat e PSsë dhe tre deputetët që nuk dorëzuan mandatet dhe bënë shumë mirë që nuk i dorëzuan. Ata e kanë tërësisht të kontestueshme nga ana ligjore dhe Kushtetuese. Çfarë krimi ka bërë Presidenti? Nuk bëhet fjalë për fatin tim politik, se unë jam në rregull për aq kohë sa kam respektuar interesat e shqiptarëve dhe interesin publik. Nuk ia kam marrë kompetencën askujt. U kam kërkuar të më krijojnë mundësinë që të zbatoj kompetencën time dhe hajde Kuvend të bashkëpunojmë, ata thonë jo. Duan ta rrëmbejnë sepse na duhet të kemi Gjykatën Kushtetuese dhe çdo gjë. Ky është rrëmbim i qartë e flagrant dhe pa stil fare.
Edhe Kryeministri Rama këtë thotë, që punoj me Kushtetutën e Shqipërisë..
Kryeministri thotë ' dëgjo se ne kemi folur me partnerët'. Unë nuk kam folur me partnerë. Unë flas me Kushtetutën e Shqipërisë. Dhe këtë e kemi bërë me Komisionin e Venecias. Ajo i ka bërë këto sugjerime që ajo të bëhet në mënyrë të balancuar. Tre Presidenti, tre Kuvendi, tre Gjykata e Lartë dhe këto do të përcaktohen sipas radhës kushtetuese.
Keni kaluar kompetencën, por pa shkelur Kushtetutën..
Ky është një spekulim, sepse Venecia në draftin e parë foli që mund të ketë tejkalim të kompetencës. Kushtetuta ka vetëm shkelje. Venecia, pasi mori përgjigjet tona, bëri të qartë që pavarësisht se çfarë pretendimesh keni ju për Presidentin, që kjo është një gjë kot, nuk duhet të vazhdoni me këtë procedurë. I vetmi institucion që nuk është nën kontrollin e maxhorancës, është ai i Presidentit dhe e vetmja shpresë që mund të ketë sistemi i drejtësisë dhe çdo qytetar, që është Gjykata Kushtetuese, të kapet në mënyrë më flagrante. Për çfarë do të më shkarkojë mua Gjykata Kushtetuese? Kam bërë gjë akt tradhtie ndaj Shqipërisë unë? Për çfarë? Presidenti shkarkohet kur janë 94 vota në Parlament dhe ata kanë 82 vota dhe ata 30 deputetët që nuk dorëzuan mandatet. Ata çdo gjë tjetër e kanë të kontestueshme nga ana kushtetuese dhe ligjore. Presidenti shkarkohet për shkelje të rënda, që do të kenë vënë në diskutim kufijtë e Shqipërisë.
Ju keni hallin e fatit tuaj politik, zoti President?
Këtu nuk bëhet fjalë për fatin tim politik. Ma hiqni pengesën kushtetuese. Ka një plan për shpopullimin e Plani i Integrimit në BE. Nuk është se do kishin bërë dialog politik, do ishin ndëshkuar çështjet e dosjeve si Dibra dhe Shijaku, Reforma në Drejtësi do të zbatohet sipas Kushtetutës. Do mbështetej iniciativa e Presidentit për të shfuqizuar 30 qershorin dhe zhvilluar zgjedhje gjithëpërfshirëse. Jo vetëm ky konflikt, por edhe mungesa e dialogut politik, është e mjaftueshme për të mos hyrë në BE. Të gjithë ata që mbështesin këtë konflikt, janë të interesuar për zhbërjen e Shqipërisë. Ka një plan për shpopullimin e Shqipërisë, siç ishte plani për lënien e vendit pa Gjykatë Kushtetuese. Ky është shqetësimi i Ilir Metës. Nuk kam shumë shpresë te ndërkombëtarët se kanë hallet e tyre. Pse është shpopulluar Shqipëria nuk është problem i madh dhe për Gjermaninë që kërkon fuqi punëtore. Edhe Kanadaja. Nuk është tragjedi e madhe për ta. Për ne është problem i madh dhe nuk e dimë se çfarë do të na vijë, se ky vend bosh nuk do të ndodhet. Vetëm ne do ta zgjidhim. Sa u takon kushteve të Bundestagut, është zhgënjyese që nuk ka asnjë përpjekje serioze për të krijuar frymën që jep një zgjidhje dhe shpresë.
Si e shikoni nismën rajonale të Shengenit Ballkanik?
Më shqetëson se shoh mijëra qytetarë serbë që dalin para Ambasadës së Malit të Zi në Beograd duke kërcyer e thonë është i sharë kush nuk kërcen, është shqiptar. Pas ca ditësh dëgjojmë se ajo që ndodhi me ligjin me fetë në Mal të Zi mund të ndodhë dhe në Kosovë. Jam për marrëdhënie miqësore me të gjitha vendet, përfshirë Serbinë mbi bazën e partneritetit dhe respektit. Nuk kemi pse ta vëmë në pozitë të vështirë Vuçiçin që t'i kërkojmë të dënojë masakrat dhe genocidin e Reçakut, por të mos provojë dhe të thotë Reçaku ishte shpikje e ambasadorit amerikan. Vjet në kohën që flitej për zgjidhje përfundimtare, qoftë edhe me korrigjim të kufirit, Presidenti i Serbisë deklaroi në Mitrovicë se Millosheviçi ishte udhëheqës i madh, kishte qëllime të mira, pavarësisht se nuk i realizoi dot.
Presidenti shkarkohet kur janë 94 vota në Parlament, ata kanë 82 vota, votat e PS- së dhe tre deputetët që nuk dorëzuan mandatet dhe bënë shumë mirë që nuk i dorëzuan. Ata e kanë tërësisht të kontestueshme nga ana ligjore dhe Kushtetuese