Horror në Mallakastër, nipi 16- vjeçar me dy shokët vret nusen e xhaxhait
Ngjarja ka ndodhur më datë 5 janar gjatë tentativës për grabitje. Viktima u dhunua, u lidh me litar e më pas u hodh në rezervuar
Një krim makabër ka ndodhur tri ditë më parë në fshatin Gjerbës të Mallakastrës, ku një 16- vjeçar, në bashkëpunim me dy shokët e tij, rrëmbeu e vrau nusen e xhaxhait.
Sipas informacioneve të Policisë, nipi i burrit ka shkuar për të vjedhur, por më pas vrau 50- vjeçaren Drita Saliaj. Ngjarja e rëndë ka ndodhur më datë 5 janar, ndërsa dje është bërë e mundur zbardhja e saj, duke vënë në pranga edhe autorët e krimit.
DENONCIMI
Autorë të dyshuar të ngjarjes janë 3 persona, ndërsa njëri prej tyre është nipi i familjes. Të tre shtetasit janë vënë në pranga dje nga Policia, ndërsa akuzohen për vrasjen e 50- vjeçares Drita Saliaj. Burimet zyrtare të Policisë bënë të ditur se në orët e para të mëngjesit të djeshëm, familjarët e viktimës kanë denoncuar largimin misterioz të saj nga shtëpia. Pas marrjes së denoncimit, shërbimet e Komisariatit të Policisë Mallakastër, në bashkëpunim me strukturat policore të Drejtorisë Vendore të Policisë Fier, organizuan punën dhe në kohë rekord zbardhën ngjarjen.
HETIMET
Pas hetimeve të kryera rezultoi se nipi i shtetases së humbur, djali i vëllait të burrit, në bashkëpunim me 2 shokë të tij, në datën 05.01.2020, kanë shkuar për të vjedhur në banesën e 50vjeçares dhe pas rezistencës së hasur nga kjo e fundit, e kanë lidhur dhe hedhur në rezervuarin e fshatit Gjerbës. Në vijim të punës për zbardhjen e plotë të ngjarjes, nga shërbimet e Policisë Mallakastër dhe polumbarët e Repartit Special Renea u gjet në rezervuar trupi i pajetë i shtetases Drita Saliaj. Në pranga u vunë: shtetasi L. Saliaj, 16 vjeç, nipi i viktimës, banues në Gjerbës; S. Sh., 16 vjeç, banues në Çërrillë; dhe
Ervis Zotkaj, 26 vjeç, banues në Gjerbës, Mallakastër.
NIPI
Burimet kanë treguar se nipi i burrit të viktimës e dinte që xhaxhai i vet ishte emigrant dhe gruaja jetonte e vetme në shtëpi. Ai ka planifikuar të grabiste banesën e gruas, por kjo e fundit, edhe pse errësirë, ka arritur t'i pikasë të rinjtë dhe ka njohur nipin e burrit. Ajo dyshohet se ka bërë rezistencë duke u kërkuar të largohen dhe do ta harronte këtë çast, por të rinjtë, nga frika se do t'i denonconte, e kanë lidhur gruan dhe e kanë zhvendosur që aty duke e hedhur në rezervuarin e fshatit rreth 2 kilometra larg banesës. Trupi i saj është gjetur ditën e djeshme nga rezervuari i fshatit, ndërsa do t'i nënshtrohet një ekspertize ligjore.
GRUAJA, E VETME NË SHTËPI
50- vjeçarja Drita Saliaj prej shumë vitesh mësohet se jetonte e vetme në shtëpinë e saj në fshatin Gjerbës, pasi burrin dhe dy djemtë i qëndronin në emigrim në Greqi. Nipi i burrit të saj dyshohet të ketë pasur informacione që 50- vjeçarja mund të kishte shuma parash në shtëpi. Pas këtij informacioni, 16- vjeçari L. Saliaj ka bërë planin e grabitjes. Natën që ndodhi ngjarja askush nuk ka kuptuar gjë. Të nesërmen, familjarët e gruas, duke tentuar të lidhen në telefon, e kanë pasur të pamundur. Kjo ka bërë që ata të alarmohen te njëri- tjetri dhe të bindur se gruaja ishte zhdukur pa lënë gjurmë, i janë drejtuar Policisë për të bërë denoncim. Pa kaluar shumë kohë, Policia e Mallakastrës në bashkëpunim me atë të Fierit ka nisur kërkimet në fshatin Gjerbës. Nga hetimet ka rezultuar që 50- vjeçarja të jetë vrarë dhe hedhur në rezervuarin e fshatit. Ajo është nxjerrë prej aty nga polumbarët, ndërsa familjarët nuk e kanë pritur aspak mirë këtë lajm. Ata kanë hedhur akuza të rënda ndaj autorëve, ndërsa kërkojnë dënimin më të rëndë për ta.