Ajatollah kërkon sulme të drejtpërdrejta ndaj SHBA
Trump dërgon bombarduesit, trupat amerikane largohen nga rajoni
Ajatollah Ali Khamenei ka bërë thirrje për sulme të drejtpërdrejta ndaj interesave amerikane si hakmarrje për vdekjen e komandantit të forcave elitare Quds, Qassem Soleimani.
Khamenei ka urdhëruar forcat iraniane për sulme direkte dhe që të mos mbështeten te bashkëpunëtorët e Iranit në rajon. Lideri suprem, i cili ka qarë në publik për vdekjen e Soleimanit, ka deklaruar se do të ndërmarrë një hakmarrje të rëndë për sulmin me dron që vrau gjeneralin. Ndërsa kreu i gardës revolucionare iraniane, Hossein Salami, u zotua në funeralin e Soleimanit se “do t’u vërë flakën” aleatëve amerikanë në rajon. “Martiri Qassem Soleimani është më i fuqishëm... tani që ka vdekur. Armiku e vrau atë padrejtësisht. Ne do të hakmerremi. Ne do t’u vendosim flakën atyre që ata pëlqejnë”, tha Salami, duke nxitur thirrjet “Vdekje Izraelit!”. Teherani thotë se ka punuar mbi 13 grupe planesh për hakmarrje ndaj vrasjes së Soleimanit. Ali Shamkhani, sekretari i Këshillit të Lartë të Sigurisë Kombëtare të Iranit, tha se edhe më i dobëti mes tyre do të ishte një makth historik për SHBA. “Nëse trupat amerikane nuk e lënë rajonin tonë vullnetarisht dhe menjëherë, ne do të bëjmë diçka për t’i përcjellë ata horizontalisht”, tha Shamkhani. Forcat amerikane janë përgatitur për hakmarrje dhe koalicioni i drejtuar nga SHBA kundër ISIS tha në një deklaratë se po ndalonte luftën e tij kundër xhihadistëve për t’u mbrojtur. NATO ka njoftuar të martën se do të largojë një pjesë të personelit nga Iraku për shkak të rritjes së rrezikut ndaj sigurisë së tyre pas vrasjes së gjeneralit iranian. Zyrtarët amerikanë po përgatiten që Irani t’i përgjigjet vrasjes së gjeneralit të tij më të fuqishëm me sulme ndaj një komandanti ushtarak amerikan. Presidenti Donald Trump urdhëroi sulmin e 2 janarit kundër gjeneralit Qassem Soleimani, kreut të forcës elitare Quds Force të Iranit, pas vdekjes së një kontraktori amerikan në Irak. Tani zyrtarët besojnë se hapat e ardhshëm nga Irani do të përcaktojnë rrjedhën përfundimtare të krizës. Inteligjenca amerikane nuk është e qartë nëse lëvizjet e fundit ushtarake të Iranit janë krijuar për të forcuar mbrojtjen e Teheranit apo për t’u përgatitur për një sulm. Ndërkohë, SHBA po vazhdon të forcojë pozicionet e veta në rajon. Një zyrtar tha që SHBA parashikonte një sulm të madh brenda një ose dy ditësh. Pentagoni ka dërguar gjashtë bombardues “B- 52” në bazën ushtarake “Diego Garcia” në veri të Oqeanit Indian si përgatitje për vazhdimin e mundshëm të sulmeve ushtarake ndaj Iranit. SHBA ka disa baza në vendet fqinje të Iranit, por zgjodhi bazën “Diego Garcia” sepse nuk arrihet as nga raketat me rreze më të gjatë që disponon Irani. Forcat ajrore amerikane kanë performuar një shfaqje të madhe fuqie duke lançuar 52 avionë të fshehtë luftarakë “Lightning II” plotësisht të armatosur, nga baza ajrore në Utah. Numri i avionëve “F- 35A” që vlejnë në total 4.2 miliardë dollarë, përkonte me numrin e lokacioneve që SHBA ka deklaruar se do të godasë në Iran, në rast se ata kundërpërgjigjen për vrasjen gjeneralit Soleimani.
Më shumë se një milion njerëz dolën në rrugë për të përcjellë gjeneralin të martën, në qytetin e tij të lindjes, Kerman. Mbipopullimi kishte shkaktuar kaos dhe shtypje, e cila la 56 njerëz të vdekur dhe 213 të plagosur. Varrosja e Soleimanit u shty pas kësaj ngjarjeje, por më vonë u zhvillua në seksionin e dëshmorëve në Kerman.