Akuza e PD: Kryebashkiaku i Mallakastrës ka qenë i dënuar
Ismailaj: “Jam i hapur për çdolloj verifikimi”. Bardhi: “Ismailaj dhe Rama e dinë mirë të shkuarën kriminale, ç'i kujton 25 shkurti?!”
Partia Demokratike i kërkon zyrtarisht Prokurorisë të verifikojë të kaluarën e kryebashkiakut të Mallakastrës, Qerim Ismailaj.
Selia blu dyshon se Ismailaj ka të shkuar kriminale. Pas Shkodrës, Vorës dhe Vaut të Dejës, i zgjedhuri vendor i Mallakastrës, Qerim Ismailaj, sipas PD- së ndodhet në kushtet e ndalimit për të kandiduar dhe për t'u zgjedhur në një funksion të lartë publik, për shkak se dyshohet se ka qenë i arrestuar/ ndaluar në Greqi dhe se në periudhën 1999- 2000, ndaj tij është marrë masa e dënimit dhe dëbimit nga autoritetet përgjegjëse greke. Në kërkesën e sekretarit të përgjithshëm të Partisë Demokratike, Gazment Bardhi, drejtuar Prokurorisë së Përgjithshme, thuhet se kryebashkiaku i Mallakastrës ka falsifikuar formularin e vetëdeklarimit. "Informacionet e Partisë Demokratike tregojnë se Qerim Ismailaj ka falsifikuar formularin e dekriminalizimit, për shkak se pyetjeve nëse është ndaluar apo arrestuar ndonjëherë nga organet ligjzbatuese për kryerjen e një vepre penale, nëse është dënuar ndonjëherë nga autoritetet gjyqësore të huaja, apo nëse ndaj tij është marrë ndonjëherë masa e dëbimit nga një shtet i huaj, rezulton se i është përgjigjur me JO. Partia Demokratike e Shqipërisë i kërkon Prokurorisë së Përgjithshme një verifikim dhe reagim institucional të shpejtë", theksohet në shkresën e sekretarit të përgjithshëm.
REAGIMI
Njësoj si edhe në rastet e mëparshme, reagimi i kryebashkiakut të Mallakastrës, Qerim Ismailajt, ishte i menjëhershëm, duke mohuar akuzat. Në një prononcim për mediat, Qerim Ismailaj tha dje se nuk ka asgjë për të fshehur nga e shkuara e tij. Ai shtoi se gjithçka e ka deklaruar në formularin e tij të dekriminalizimit, nuk ka qenë kurrë i ndaluar dhe në kohën që pretendon PD- ja, ai ka punuar si mësues. "Jam i hapur për çdo lloj verifikimi të mundshëm, unë kam deklaruar formularin, në atë kohë kam punuar si mësues, nuk kam qenë i ndaluar nga
Policia greke", ka thënë ai. Ndërkohë i pyetur nga gazetarët nëse udhëtimi që ka bërë rreth dy javë më parë në shtetin helen të ketë pasur lidhje me akuzat, Ismailaj sqaroi: "Kam motrën në Greqi, ka pasur problemet e veta familjare, ky është shkaku që kam qenë. Në asnjë rast dhe asnjë rrethanë nuk kam qenë në kushtet e ndalimit për të kandiduar në një detyrë zyrtare", vijoi Qerim Ismailaj.
KUNDËRPËRGJIGJJA
Deklaratat e kryetarit të Bashkisë së Mallakastrës,
Qerim Ismailajt, nuk e kanë bindur aspak selinë blu. Pak më vonë, numri dy i PD- së, Gazment Bardhi, doli në një deklaratë për shtyp ku e pyeti Ismailajn se çfarë i kujtonte data 25 shkurt e 20 viteve më parë. "Njëlloj si Valdrin Pjetri, Agim Kajmaku apo
Babani i Vaut të Dejës, edhe Edi Rama i Mallakastrës u përbetua sot para mediave se nuk ka pasur asnjëherë probleme me drejtësinë në Greqi. Në fakt, ky është një mashtrim. Ai, njëlloj si Edi Rama, e di mirë se ka të shkuar kriminale dhe se është i dënuar në shtetin grek", tha Bardhi. Sekretari i përgjithshëm i PDsë nuk dha detaje se për çfarë vepre penale është dënuar Ismailaj në shtetin grek. "Partia Demokratike po punon dhe shumë shpejt do të provojë për opinionin publik edhe zyrtarisht se Edi Rama i Mallakastrës ka të shkuar kriminale dhe se në bazë të ligjit të dekriminalizimit nuk duhet të ushtrojë asnjë funksion publik", vijoi Bardhi. Më pas, numri dy i PD- së i kujtoi Prokurorisë së Përgjithshme dhe Kryeministrit Rama se verifikimi i tyre nuk është detyrë e PD- së, por e PS- së, që i ka kandiduar, dhe e Prokurorisë.