Rama flet për dakordësi, Basha: Sistemi nuk garanton ndarjen nga të inkriminuarit
“Krizë artificiale e injektuar në politikën shqiptare nga njëra palë”
Kryeministri Rama tha dje se është në një proces dakordësie me opozitën sa u takon rekomandimeve të OSBEODIHR- it për Reformën Zgjedhore.
Një ditë para marrjes zyrtare të drejtimit të OSBE- së nga Shqipëria për një periudhë gjashtëmujore, kreu i qeverisë tha se kriza politike në vend është artificiale, e prodhuar nga opozita. “Për sa i përket pjesës së krizës së madhe politike, faktikisht është e tejkaluar fjala “e madhe”. Është një krizë artificiale e injektuar në politikën shqiptare nga njëra palë, por është shumë e rëndësishme që sot jemi në një proces dakordësie lidhur me Reformën Zgjedhore, me, pikërisht, implementimin në tekstin e legjislacionit tonë të rekomandimeve të OSBE- së. Kështu që, nuk mendoj se në këtë familje prej 57 vendesh, përfaqësojmë ndonjë vend me ndonjë krizë të veçantë. Absolutisht!”, tha Rama gjatë një bashkëbisedimi me gazetarët shqiptarë, që kishin udhëtuar me të drejt Vjenës. Sipas tij, opozita ka shprehur vullnetin e saj për t’u përfshirë në përmbushjen e rekomandimeve të ODIHRit për zgjedhjet. “Fakt është që opozita ka shprehur - ju e keni dëgjuar, se edhe unë me të dëgjuar e kam, nuk e kam me të takuar - dakordësinë për t’u përfshirë në proces. Kjo është një shenjë shumë e mirë për rekomandimet e OSBE- ODIHR- it. E në këtë rast, kemi një bosht shumë objektiv që s’kemi nga luajmë as njëra palë dhe as pala tjetër dhe kemi edhe ODIHR- in, që fare mirë mund të na ndihmojë për të thënë është kështu, apo është ashtu. Kështu që, kjo është një bazë e mirë”, tha Rama.
ANTISHPIFJA Për kreun e qeverisë shqiptare, edhe debati për ligjin “Antishpifje”, ka lindur nga mungesa e leximit të draftit, sepse, sipas tij, OSBE- ja ka dhënë miratimin e saj. “Në raport me këtë mision, unë e them pa asnjë zbukurim, ne nuk jemi komod, jemi super komod, jemi super krenarë që kemi ndërmarrë këtë përgjegjësi kaq të madhe dhe që Shqipëria sot është në një pozicion të tillë, që është dhe një vlerësim, padiskutim, gjë që e relativizon shumë pikturën e krizës dhe të pakënaqësisë politiko- mediatike të Tiranës. Gazetarët e pakënaqur me ligjin, duhet të lexojnë ligjin, por kjo nuk është një çështje e OSBE- së. OSBE- ja e ka miratuar plotësisht draftin që ka kaluar në Parlament dhe si kryetar i qeverisë dhe i maxhorancës, unë them që jemi të gatshëm të ofrojmë edhe kushte, salla leximi, asistencë teknike për lexim, që kush është i pakënaqur nga ligji, ta lexojë atë, sepse pakënaqësitë e ekspozuara, mua, dhe neve, më kanë treguar se vijnë si rezultat i mosleximit të ligjit”, u shpreh Rama.
KOSOVA Kreu i qeverisë tha se si drejtues i OSBE- së do të bëjë përpjekje konkrete për ta përfshirë Kosovën në tryezën e diskutimeve të vendeve anëtare të OSBE- së. “Do t’i bëjmë të gjitha ato që kemi planifikuar dhe ju thashë, nuk e marrim drejtimin e OSBE- së për të rishpikur OSBE- në, as për të rishpikur mekanizmat, qasjen tradicionale, sepse, faktikisht, vërtet jemi drejtues të organizatës për një vit, por është një drejtim që është shumëkoordinim me të tjerë dhe me vendimmarrje që duhet patjetër miratuar nga të tjerët. Pra, nuk është një drejtim i një qeverie në një vend. Në këtë aspekt, sigurisht që ne kemi disa ambicie. Kemi vendosur disa prioritete. Kemi qenë të vëmendshëm që te vendosja e prioriteteve, të mos vendosim prioritete që janë dëshira, apo të parealizueshme, dhe mendoj që e kemi kapacitetin e duhur të bëjmë diçka edhe për Kosovën, aq më tepër tani që unë në Prishtinën zyrtare jam “tradhtar”, në Beogradin zyrtar jam “nacionalisti më i rrezikshëm shqiptar”. Kështu që, në këtë aspekt, besoj që kam një pozicion që mund të më shërbejë si ‘ chairman in office’ i OSBE- së”, tha Rama.
Është shumë e rëndësishme që sot jemi në një proces dakordësie lidhur me Reformën Zgjedhore, pikërisht me implementimin në tekstin e legjislacionit tonë të rekomandimeve të OSBE- së. Kështu që nuk mendoj që në këtë familje prej 57 vendesh përfaqësojmë ndonjë vend me ndonjë krizë të veçantë
Kryesimi i OSBE- së nga Shqipëria është një arritje fantastike e Shqipërisë. Kjo organizatë është krijuar 45 vite më parë dhe Shqipëria ka qenë jo vetëm vendi i vetëm europian që e refuzoi, por edhe e goditi pa mëshirë që në krijim dhe sot ne jemi me gjithë këtë përgjegjësi për të drejtuar OSBE- në