Irani përfshin edhe Tiranën në konfliktin e madh, Meta: Nuk jemi shtet djallëzor
Lideri i Iranit akuzon: “Është një vend shumë i vogël, por shumë i keq në Europë”. Rama: “Jemi në duar të sigurta”
Pak orë pas sulmeve me raketa nga ana e Iranit ndaj dy bazave ushtarake amerikane, lideri suprem në Teherean, Ali Khamenei, ka lëshuar disa kërcënime edhe në drejtim të Shqipërisë.
Edhe pse nuk e përmendi me emër, Khamenei la të nënkuptuar se vendi i tij është i “inatosur” me Tiranën zyrtare për shkak të rreth 3500 muxhahedinëve që janë strehuar në vendin tonë prej disa vitesh. Ai e cilësoi Shqipërinë si një vend djallëzor, që po përpiqet t’i bëjë keq Iranit. “Është një vend shumë i vogël, por shumë i keq në Europë. Atje, elementët kriminalë bashkëpunojnë me amerikanët dhe me tradhtarët e Iranit dhe planifikojnë sulme kundër vendit tonë. Dhe plani që ata kishin u pa qartë, me protestat që u mbajtën në Iran, pasi disa nga ata tradhtarë erdhën në Iran për të protestuar. Agjentët që ne i kemi armiq, nisën ta zbatojnë këtë plan, duke vrarë dhe duke goditur qeverinë dhe Kushtetutën tonë”, tha lideri suprem i Iranit, Khamenei.
META Por, pas këtyre fjalëve të liderit iranian, ka ardhur reagimi i Presidentit Ilir Meta. Ky i fundit, përmes një mesazhi të shpërndarë për mediat, e cilëson lëshimin e raketave iraniane në bazën ushtarake të SHBA si një provokacion me pasoja shumë të rrezikshme për gjithë botën. “Raketat e lëshuara nga Irani drejt dy bazave ushtarake irakiane që strehojnë ushtarakë amerikanë dhe personel të koalicionit, janë një veprim provokues me pasoja të rrezikshme për rajonin dhe stabilitetin e tij. Irani duhet të respektojë marrëveshjet ndërkombëtare, ligjet ndërkombëtare dhe detyrimet e tyre në interes të paqes. Shqipëria nuk është një vend djallëzor, por një vend demokratik që ka vuajtur nga një diktaturë djallëzore e pashembullt, ndaj të drejtat e njeriut i ka të shenjta”, shkruan Meta.
RAMA Ndërsa Kryeministri Rama nuk u shpreh i shqetësuar nga fjalët e Khamenei. Sipas Ramës, në këtë rrugë Shqipëria është me aleatë shumë të fuqishëm dhe se është në duar të sigurta. Sa i përket strehimit të muxhahedinëve në Shqipëri, Rama e cilësoi këtë veprim si një akt humanitar. “Kjo është një temë dhe është një çështje që nuk është e re për ne, në raport me Iranin. Ne kemi ndërmarrë një veprim që i bën nder Shqipërisë, që është në vazhdën traditës shqiptare, është në vazhdën e një aleance strategjike të panegociueshme, të padiskutueshme me Shtetet e Bashkuara, për të mirëpritur apo për t’i hapur dyert një grupi njerëzish që janë në rrezik për jetën. E siç shkruhet dhe në marrëveshjen që ne kemi bërë, ata në Shqipëri janë si rezultat i një operacioni humanitar, jo politik. Unë nuk besoj që kjo e ekspozon në mënyrë të posaçme Shqipërinë dhe nuk kemi arsye të besojmë këtë, pikërisht sepse ne jemi në kontakt permanent me aleatët tanë dhe kur është puna tek inteligjenca, besoj që ata janë të pakonkurrueshëm botërisht dhe si të thuash, në këtë rast, ne jemi në duar të sigurta kur është fjala te marrja e informacionit dhe nuk kemi arsye objektive të besojmë që ka një ekspozim të veçantë”, tha Rama.
BASHA Në lidhje me këtë çështje reagoi edhe kreu i PD- së, Lulzim Basha, i cili tha se pozicioni i Shqipërisë duhet të mbetet i palëkundur përkrah SHBA- ve. “Liria ka një çmim të lartë ndërkombëtarisht dhe unë jam krenar që, si ministër i Jashtëm, kam rreshtuar Shqipërinë krah përkrah Shteteve të Bashkuara të Amerikës në NATO dhe besoj fort se kjo aleancë vlerash, mbi të gjitha, është një aleancë e lirisë, dinjitetit njerëzor. Ndaj, dua të shpreh edhe një herë në emrin tim, në emër të PD- së dhe në emër të opozitës së bashkuar, qëndrimin tonë të qartë, që e kemi bërë të ditur prej orës së parë të zhvillimit të ngjarjeve, përkrah SHBA”, tha Basha.
Khamenei: Është një vend shumë i vogël, por shumë i keq në Europë. Atje, elementët kriminalë bashkëpunojnë me amerikanët dhe me tradhtarët e Iranit dhe planifikojnë sulme kundër vendit tonë
Meta: Irani duhet të respektojë marrëveshjet ndërkombëtare, ligjet ndërkombëtare dhe detyrimet e tyre në interes të paqes. Shqipëria nuk është një vend djallëzor, por një vend demokratik