“Venecia” vjen në Tiranë, Meta: Gjithmonë të mirëpritur
Pas "30 qershorit" pritet përballja për Kushtetuesen
Komisioni i Venecias dhe Presidenti Meta duket se në këtë vit të ri do të konsumojnë aktin e radhës.
Në përgjigje të interesimit të televizionit "News 24", delegacioni i Komisionit të Venecias konfirmoi se do të mbërrijë në Tiranë gjatë muajit shkurt, pas kërkesës së bërë nga kryeparlamentari Ruçi në lidhje me çështjen e emërimeve në Gjykatën Kushtetuese të dy anëtarëve. Fill pas këtij konfirmimi nuk vonoi edhe reagimi nga kreu i shtetit. Ishte zëdhënësi i Presidentit Meta, Tedi Blushi, i cili përmes një reagimi në rrjetet sociale, ka shprehur gatishmërinë për ta pritur sërish këtë mision në Tiranë. "Venecia, gjithmonë e mirëpritur në Shqipëri!", shkroi shkurtimisht në "Facebook", Blushi. Më herët, edhe vetë Meta në intervistat e tij ka shprehur gatishmërinë për të konsultuar dhe për të marrë opinionin e Komisionit të Venecias për çdo çështje që prodhon debat në politikën shqiptare. Meta theksoi se beson në kredibilitetin e këtij institucioni, që sipas tij nuk mund të cenohet nga asnjë debat i brendshëm politik. Çështja e Gjykatës Kushtetuese pritet të jetë përballja e dytë mes maxhoranës dhe Presidentit Meta. Më herët, të dyja palët u ballafaquan gjatë muajit tetor pas kërkesës së PS- së për ta shkarkuar Metën, duke pretenduar se kishte bërë shkelje të rëndë të Kushtetutës me shtyrjen e zgjedhjeve lokale të 30 qershorit. Në "përballjen" e parë, ashtu siç bën zakonisht "Venecia", nuk dha një përgjigje të prerë, por nëpër tekst, të dyja palët gjetën argumente për të mbrojtur qëndrimet e tyre. Nuk besohet që të ketë ndryshime të mëdha edhe për këtë çështje të dytë, pasi duhet theksuar se Komisioni i Venecias ka kompetenca vetëm si organ këshillimor dhe opinionet e tij nuk janë taksative për vendet që u çojnë kërkesat.