Zbardhen kushtet e reja të aplikimit për pension
Qeveria ndryshon procedurat e aplikimit për pensionet. Ministrja flet për reduktimin e dokumenteve. Kategoritë që përfitojnë nga ndryshimet dhe afatet e reja
Dorëzimi i dokumenteve dorazi në zyrat e Agjencisë së Sigurimeve nuk është e vetmja mënyrë aplikimi për ata që këtë vit mbushin moshën e daljes në pension.
Duke nisur nga ky muaj, pensionistët do të kenë mundësi që kërkesën ta dorëzojnë edhe përmes portalit eAlbania. Gjatë një vizite në Agjencinë e Sigurimeve Shoqërore Tiranë, Ministrja e Financave Anila Denaj tha se në muajt e parë, për shkak të vështirësive që mund të hasin të moshuarit, do të asistohen edhe nga punonjësit e institucionit. Sipas Denajt, një praktikë e tillë bën të mundur lehtësimin e procedurave për qytetarët, shmangien e ecejakeve nga një zyrë në tjetrën, si edhe çfarë është më e rëndësishme, shkurton kohën e pritjes. “Është marrë një nismë që të gjitha shërbimet që kanë nevojë për aplikim, si për pension apo për një dokumentacion, ne tua japim mundësinë e aplikimit nëpërmjet shërbimit online apo nëpërmjet sistemeve. Të paktën në këta muajt e parë të vitit, i gjithë sporteli do të jetë aty edhe për të mësuar se si të bëhet aplikimi”, tha Denaj.
DOKUMENTET Sa u takon procedurave të aplikimit, ministrja bëri të qartë dje se po punohet për të reduktuar numrin e dokumenteve që duhet të paraqesin qytetarët gjatë aplikimit për një shërbim të caktuar, ku në disa raste do të jenë vetë institucionet shtetërore ato që do të sigurojnë dokumentet e kërkuara. Për ata që dalin rishtazi në pension, në dosje duhet vetëm një kopje e kartës së identitetit, si edhe libreza e cila tregon eksperiencën e tyre të punës. Në rastin e burrave kërkohen edhe vërtetimet e ushtrisë, ndërsa për femrat, diplomat e shkollave të larta. “Në ato institucione që kanë arkivin, e cila është pronë e shtetit, ky informacion nuk do të merret më nga ju, por do të merret nga ne. Atë listë dokumentesh që e ka pronë shteti, do ta marrim ne për ju dhe kjo do të shkurtojë një pjesë të kohës që ju sot e harxhoni duke udhëtuar me autobus e duke shkuar diku tjetër, apo duke pritur dy orë në radhë diku tjetër. Radha, kostoja dhe kostoja e fshehur, duhet të zhduken dhe këto janë tre objektivat kryesore se pse ky shërbim po shkon online. Ne jemi duke bërë një filtrim të gjithë dokumenteve dhe të thjeshtojmë të gjithë dokumentacionin që ju të keni mundësi të merrni sa më pak dokumente kur të vini këtu. Dokumentet e panevojshme duhet të reduktohen. Shpresojmë që këtë proces ta bëjmë gradualisht dhe të jetë edhe në përfitimin tuaj”.
HADO Pak ditë më parë, edhe drejtori i Institutit të Sigurimeve Shoqërore ka sqaruar ndryshimet e skemës, si edhe kategoritë që përfitojnë. “Të gjitha aplikimet për pension pleqërie, invaliditeti, suplementarë, familjarë, nga 1 janari i vitit të ardhshëm do të bëhen online. Që do të thotë se nuk është e nevojshme që qytetarët të paraqiten në sportele, por kërkesën për këtë lloj përfitimi ta bëjnë online nëpërmjet portalit e- Albania nga shtëpia e tyre. Ky formular ofron mundësinë edhe të skanimit të dokumenteve që do dorëzojnë te sigurimet shoqërore. Duke qenë se ky proces është i ri dhe shpesh për kategorinë e pensionistëve e vështirë për t’u realizuar, të gjithë punonjësit do t’i asistojnë të gjithë pensionistët që mund ta bëjnë”, deklaroi Hado. Aktualisht, Instituti i Sigurimeve Shoqërore ofron 63 shërbime për qytetarët, ndërsa numri i aplikime brenda një viti arrin në 390 mijë. Gjatë 2020ës janë programuar të jenë online 510 shërbime ose 94 për qind e të gjitha shërbimeve që ofrohen nga institucionet e Ministrisë së Financave dhe Ekonomisë, ku 188 shërbime bëhen efektive më 1 janar, 270 shërbime bëhen efektive më 30 qershor dhe 26 shërbime bëhen efektive dhjetor 2020.