Kryeministri Rama, vizitë në Moskë dhe Kiev
“Pjesë e axhendës së drejtuesit të OSBE dhe angazhimeve që kam marrë”
Kryeministri Rama pritet të zhvillojë shumë shpejt vizitë zyrtare në Moskë, Uashington dhe Kiev. Si Kryeministër i vendit që drejton OSBE- në, Rama tha dje se është në pritje të rakordimit të axhendës së këtyre vizitave, ku pritet të takohet me Presidentin rus, Putin, dhe Presidentin amerikan, Trump. “Vizita në Rusi është pjesë e axhendës së drejtuesit të OSBE- së dhe është pjesë e angazhimeve që unë kam marrë, ndërkohë që gjatë gjithë vitit kemi bërë edhe harmonizimin e angazhimeve me ministrin në detyrë për të balancuar obligimet e OSBE- së me obligimet e brendshme dhe janë disa vizita që do bëhen shumë shpejt. Praktikisht, më të shpejtat janë vizitat në Ukrainë, në Shtetet e Bashkuara dhe në Rusi. Tani, për datat, ne presim konfirmime nga të gjitha palët, sepse duhen rakorduar me të gjitha palët”, u shpreh Rama dje në Vjenë. Pak kohë më parë, ambasadori i Rusisë në Tiranë, Aleksandër Karpushin, foli për një vizitë të mundshme në Moskë të Kryeministrit Rama. “Vizita e Kryeministrit Rama në Moskë, patjetër është e mundur dhe madje është e nevojshme, por për të realizuar një udhëtim të tillë, është e domosdoshme, siç u shprehët me të drejtë, një axhendë solide, një axhendë substantive, përfshirë këtu pse jo, edhe nënshkrimin e dokumenteve dypalëshe”, është shprehur Karpushin në dhjetor 2016. Sipas tij, është e nevojshme të firmosen traktatet e bashkëpunimit mes dy vendeve. “Kemi rënë dakord që shumë shpejt duhet caktuar edhe bashkëkryetari i këtij komisioni për palën shqiptare dhe që në atë moment, unë u shpreha i gatshëm që pala ruse të japë propozimet e saj për axhendën e sesionit të radhës së këtij komisioni, përfshirë këtu edhe shqyrtimin e çështjes së Traktatit të bashkëpunimit, të miqësisë midis dy shteteve, i cili meqë ra fjala, për fat të keq, akoma nuk është firmosur”, ka thënë Karpushin.