“Individët e larguar gëzojnë imunitet në parti”

"Ligji nuk parandaloi të inkriminuarit në zgjedhjet e 2019"

Mbi 860 zyrtarë të lartë dhe të mesëm janë shkarkuar dhe kanë humbur mandatin si pasojë e ligjit të dekriminalizimit që nga viti 2014, kur maxhoranca dhe opozita miratuan ligjin "Për garantimin e integritetit të personave që zgjidhen, emërohen ose ushtrojnë funksione publike", i ashtuquajturi Ligji i Dekriminalizimit. Sipas një raporti të Institutit të Studimeve Politike të publikuar ditën e djeshme, midis viteve 2014- 2016 dhanë dorëheqjen tre deputetë, dy të tjerëve ia hoqi KQZ- ja, si dhe u larguan mbi 150 zyrtarë të lartë e të mesëm në nivelet e qeverisjes. Ndërsa midis viteve 20162019 humbën mandatin edhe dy deputetë të tjerë, tre kryetarë bashkie, një anëtar i Gjykatës Kushtetuese/ Gjykatës së Lartë dhe më shumë se 200 këshilltarë lokalë e rreth 500 zyrtarë të nivelit të mesëm e të lartë. Ndonëse numri i të larguarve nga ligji i dekriminalizimit është i lartë, sipas ISP- së, statistikat nuk janë shumë domethënëse. Instituti ngre shqetësimin se edhe pse pritej që kurba e përfshirjes së individëve me rekorde kriminale në politikë dhe qeverisje të ulej ndjeshëm me kalimin e viteve, në zgjedhjet lokale 2019 treguan se trendi vjen gjithnjë në rritje. "Ka një hendek të thellë midis koncepteve të dekriminalizimit dhe vullnetit politik për ta jetësuar atë në mënyrë cilësore dhe integrale", thuhet në raportin e ISP- së. Analiza e bërë nga Instituti i Studimeve Politike konstaton se ligji i dekriminalizimit është i paplotë. "Legjislacioni i dekriminalizimit nuk parashikoi të gjitha elementet që e bëjnë procesin efektiv, parandalues dhe transparent aktualisht e në të ardhmen. Individët me rekorde kriminale, të larguar nga Parlamenti dhe qeverisja vijojnë të gëzojnë imunitet politik në partitë e tyre politike. Nuk ka ende vendime publike të partive për pezullim apo për t'i përjashtuar nga partia", theksohet në raportin e ISP- së.