Frikë për epidemi nga meningjiti, Instituti konfirmon viktimën e parë
Bino: Rastet janë sporadike. S’kemi të bëjmë me situatë epidemike. I riu ndërroi jetë, pavarësisht ndihmës së madhe të mjekëve
Konfirmohet viktima e parë nga meningjiti. Shefja e Departamentit të Sëmundjeve Infektive në ISHP, Silva Bino, tha dje se 27- vjeçari nga Durrësi ndërroi jetë si pasojë e këtij infeksioni të rëndë.
Pavarësisht ndihmës mjekësore, Mariglen Mestani, me profesion polic, nuk arriti ta fitonte betejën për jetën. E pyetur për rrezikun që mund të kenë personat, të cilët mund të kenë pasur kontakt me viktimën, Bino tha se ata kanë marrë trajtimin e nevojshëm dhe nuk paraqesin asnjë rrezik. Nga ana tjetër, dyshimeve se numri i rasteve të prekura nga kjo sëmundje është më i lartë, shefja e Infektivit iu përgjigj duke thënë se deri më tani është vetëm 1 rast i evidentuar dhe jo 3. “Septicemia nga meningokoku është infeksion i rëndë, fatal, që ka një evolucion tepër të shpejtë. Kjo është arsyeja që ai person ndërroi jetë, pavarësisht ndihmës së madhe të mjekëve. Është një sëmundje e transmetueshme dhe për personat e kontaktit janë marrë masat e duhura. Nuk ka rrezik, pasi të gjithë personat që kishin kontakt me personin e prekur kanë marrë antibiotikët e përcaktuar për të parandaluar infeksionin. Sa u takon rasteve, nuk janë tre, por vetëm një rast i evidentuar”. Dy ditë më parë, po në qytetin bregdetar, një grua 33 vjeçe ndërroi jetë si pasojë e problemeve shëndetësore. Në lidhje me këtë rast, Bino bëri me dije se mostrat janë marrë dhe po analizohen. “Sa i përket rastit në Durrës, kanë ardhur mostrat dhe po analizohen, duhet të presim rezultatin dhe të themi të vërtetën”, tha Bino.
FRIKA NGA EPIDEMIA
Rasti i shënuar ka rikthyer frikën te qytetarët për një epidemi të mundshme, duke qenë se sëmundja mund të përhapet lehtësisht përmes ajrit. Por shefja e Departamentit të Sëmundjeve Infektive në ISHP bëri të qartë se nuk ka vend për panik. Rastet sipas saj janë sporadike dhe asnjë prej tyre nuk është konstatuar me simptomat e gripit. “Rastet janë sporadike. Nuk kemi të bëjmë me situatë epidemike. Të gjitha rastet janë testuar për gripin dhe kanë rezultuar negative. Asnjë rast nuk është grip. Rasti i Durrësit po ekzaminohet, dy raste të tjera janë të komunikuara se nuk janë grip. Ne po e monitorojmë të gjithë situatën epidemiologjike”. Meningjiti është një inflamacion i membranave ( meninges) që rrethojnë trurin dhe palcën kurrizore. Prekja nga meningjiti zakonisht shkakton simptoma të tilla, si dhimbje koke, ethe etj. Disa raste të meningjitit përmirësohen pa trajtim në disa javë. Të tjerët mund të jenë të rrezikshëm për jetën dhe të kërkojnë trajtim urgjent me antibiotikë. Trajtimi i vonuar rrit rrezikun e dëmtimit të përhershëm të trurit ose mund të çojë në humbjen e jetës. Infeksionet virale janë shkaku më i zakonshëm i meningjitit, i ndjekur nga infeksione bakteriale. Për shkak se infeksionet bakteriale mund të jenë kërcënuese për jetën, identifikimi i shkakut është thelbësor për trajtimin në kohë të sëmundjes.
GRIPI
Duke qenë se jemi në kulmin e stinës së dimrit, Bino ka këshilluar që personat të cilët manifestojnë vështirësi në frymëmarrje apo temperaturë, duhet të paraqiten për ndihmë të specializuar për të parandaluar shfaqjen e komplikacioneve, të cilat mund të çojnë deri në humbjen e jetës. “Këshillë është që duhet të besojnë se Instituti po bën monitorimet. Jemi në një sezon normal të gripit. Deri më tani nuk kemi intensitet të lartë. Natyrisht, kemi qarkullim të virusit të gripit, por është e rëndësishme të dihet për ata që kanë probleme, vështirësi në frymëmarrje, temperaturë të lartë nuk duhet t’i neglizhojnë”.