Kompensimi, 148 pronarët që përfitojnë nga skema me këste
ATP ndan këstin e 2, 3, 4 dhe të 5 të kompensimit financiar
Ashtu siç e parashikon edhe skema, këtë fillimvit Agjencia e Pronave ka kaluar në llogaritë e pronarëve që kanë aplikuar me kërkesë të veçantë këstin e radhës të kompensimit.
Janë 148 familje, që marrin përkatësisht këstin e 2- të, 3- të, 4- t dhe të 5- të. "ATP njofton se në fillim të vitit buxhetor 2020 ka përfunduar procedurat për lëvrimin e këstit të radhës për 148 vendime të subjekteve të shpronësuara, që kanë përfituar kompensim financiar me kërkesë të veçantë gjatë viteve 20162019, nga të cilët për 1 vendim subjekti përfiton këstin e pestë, për 6 vendime subjektet përfitojnë këstin e katërt, për 61 vendime subjektet përfitojnë këstin e tretë dhe për 80 vendime subjektet përfitojnë këstin e dytë", thuhet në njoftimin e Agjencisë. Përfituesit janë të shpërndarë në disa qarqe të vendit, përfshirë edhe Tiranën.
FONDI
Sa i takon fondit, janë 5 milionë dollarë që do të ndahen për këto familje. Paratë sipas ATP- së do të kalojnë në bankë në ditët në vijim. "Vlera totale e fondit të vënë në dispozicion nga buxheti i shtetit, që do të lëvrohet menjëherë në fillim të vitit buxhetor 2020, si këst i radhës për 148 vendimet e subjekteve përfitues është 481' 216' 781,02 lekë. ATP njofton subjektet e interesuara se vlerat përkatëse për secilin përfitues do të jenë disponibël në llogaritë e tyre në bankat e nivelit të dytë, pas përfundimit të procedurave të transfertave bankare në ditët në vazhdim".
SKEMA
Aplikimi me kërkesë të veçantë u jep mundësi pronarëve të trajtohen financiarisht përmes një kërkese të paraqitur nga ana e tyre për të përfituar 20% të shumës brenda 1 viti, 30% brenda 3 vitesh dhe 40% brenda 5 vitesh, duke hequr dorë nga pjesa tjetër e kompensimit. Që do të thotë, pavarësisht nëse vendimi është i ri në kohë, pavarësisht llojit të pasurisë së njohur dhe pavarësisht se sa arrin vlera e kompensimit, pronarët trajtohen financiarisht sipas kërkesës për 1, 3 apo 5 vite. Trajtimi i pronarëve me anë të kësaj skeme kompensimi bën që të shpenzohen shumë herë më pak para, në raport me koston reale që do të kishte ky proces nëse pronarët do të merrnin të plotë kompensimin.