Firmoset marrëveshja për 500 banesa, ministri turk: Miratoni truallin
Rama: Me porosi të Presidentit Erdogan, në zonën e Laçit banesa të reja që njerëzit të kthehen në shtëpi më të mira se ato që kanë pasur
Ministri për Rindërtimin, Arben Ahmetaj, dhe ministri turk i Mjedisit dhe Urbanistikës, Murat Kurum, nënshkruan marrëveshjen për ndërtimin e 500 banesave të reja, premtuar nga qeveria e Turqisë pas dëmeve të shkaktuara nga tërmeti i 26 nëntorit 2019.
Kryeministri Rama, në një konferencë të përbashkët me ministrin turk, tha se këto banesa të reja, me porosi të Presidentit Erdogan, do të ndërtohen në Laç. “Siç edhe është bërë e ditur dje gjatë një konference për shtyp, tani jemi në fazën e dytë të këtij projekti dhe kemi ardhur në fazën e nënshkrimit të këtij bashkëpunimi. Janë 500 njësi të reja banimi që do ndërtohen nga miqtë e ardhur nga Turqia me porosi të Presidentit Erdogan në zonën e Laçit, që njerëzit të kthehen në shtëpi më të mira se ato që kanë pasur. Ky është zëvendësimi i godinave të rrënuara dhe do të jetë një transformim i rëndësishëm i gjithë situatës urbane. Agjencia e angazhuar për këto 500 njësi, do vazhdojmë me një plan zhvillimi për të gjithë infrastrukturën. I japim zgjidhje edhe përmbytjeve në zonën e Laçit. Të dyja palët do ndajnë punën dhe në një kohë të shkurtër, do krijojmë një shembull. E falenderoj me shumë mirënjohje ministrin, gjithë delegacionin që ka ardhur bashkë me të dhe përfaqësues të specializuar në programin e ndërtimeve me karakter social në Turqi”, tha Rama. Ndërsa në fjalën e tij, ministri turk, Murat Kurum, i kërkoi palës shqiptare që t’i jepet sa më shpejt trualli, në mënyrë që të nisë ndërtimi pa vonesa. “Ju kam sjellë përshëndetjet e përzemërta të Erdogan. Ne u ndodhëm sa më pranë vëllezërve tanë shqiptarë. Ekipet tona erdhën dhe bënë përpjekje për të ndihmuar sa më shumë njerëz. Ekipet tona kanë verifikuar në terren 600 njësi dhe kemi ofruar ndihma të veçanta. Më pas, Presidenti Erdogan dha porosi për të ndërtuar 500 banesa të reja. Jemi këtu në kuadër të këtij procesi dhe deri në fund të janarit, autoritet shqiptare të na dorëzojnë truallin ku do të bëhet ndërtimi. Do të jetë një lagje shembullore dhe ndërtimi do të përshtatet me arkitekturën dhe traditën shqiptare. Ne do firmosim protokollin e parë për realizimin e këtij projekti dhe jemi të gatshëm për t’i ardhur në ndihmë Shqipërisë edhe në çështje të tjera. Ato që ne kemi bërë deri tani, do vazhdojmë t’i bëjmë edhe në të ardhmen, në kuadër të marrëdhënieve vëllazërore mes dy vendeve”, tha ministri turk.
Ministri turk: Ju kam sjellë përshëndetjet e përzemërta të Erdogan. Ne u ndodhëm sa më pranë vëllezërve tanë shqiptarë. Ekipet tona erdhën dhe bënë përpjekje për të ndihmuar sa më shumë njerëz. Ekipet tona kanë verifikuar në terren 600 njësi dhe kemi ofruar ndihma të veçanta. Më pas, Presidenti Erdogan dha porosi për të ndërtuar 500 banesa të reja. Jemi këtu në kuadër të këtij procesi dhe deri në fund të janarit, autoritet shqiptare të na dorëzojnë truallin ku do të bëhet ndërtimi