Kryemadhi: Të plotësohen kushtet e Bundestagut
“Nëse nuk hapen negociatat, e ardhmja e Shqipërisë vihet në diskutim”
Kryetarja e LSI- së, Monika Kryemadhi, shprehu gatishmërinë për t’u ulur dhe për të diskutuar për çështjen e Reformës Zgjedhore. Nga një takim në Elbasan, Kryemadhi tha se opozita e bashkuar është gati të japë kontributin e vet, pasi sipas saj duhet bërë e pamundura që Shqipëria të hapë negociatat për anëtarësim në BE. Ajo foli për një pakt kombëtar të të gjitha palëve për reformat kryesore të vendit. “Ashtu siç e ka bërë të qartë dhe z. Basha, që është Kryetari i Partisë Demokratike dhe drejtuesi i frontit opozitar, ne si opozitë jemi të gatshëm për të ecur përpara, për sa u përket të gjitha propozimeve të Reformës Zgjedhore, duke menduar që është shumë e rëndësishme mbyllja e detyrave të shtëpisë, angazhimi dhe obligimet që ka opozita shqiptare në marrëdhënie me kushtet e Bundestagut. Por, sigurisht, ka një njeri, i cili nuk do që kjo gjë të ecë, sepse duke mbyllur Reformën Zgjedhore, sigurisht që zotit Rama i vjen hapi i dytë i Reformës Zgjedhore, që janë zgjedhjet. Megjithatë, ky nuk është problemi ynë. Problemi ynë është që Shqipërisë t’i garantohet hapja e negociatave. Pse e them hapja e negociatave? E them, sepse hapja e negociatave është procesi më i rëndësishëm për garantimin dhe ruajtjen e integritetit e shtetit shqiptar, se nëse Shqipëria do të marrë një tjetër jo në hapjen e negociatave, atëherë e ardhmja e Shqipërisë do të vihet në diskutim. Sot më shumë se kurrë, Shqipëria ka nevojë për Paktin Kombëtar, që nuk është marrëveshje politike, por një pakt që ka të bëjë me realizimin e reformave kryesore siç është Reforma Elektorale, në Arsim, në Shëndetësi dhe në Bujqësi”, tha Kryemadhi.